Toshkent shahri bojxona boshqarmasining “Bosh pochtampt” bojxona postiga keltirilgan xalqaro pochta jo‘natmasida tilla buyumlar yashiringani aniqlandi. Bu haqda boshqarma axborot xizmati xabar berdi.
Mazkur jo‘natma rengen qurilmasi orqali bojxona nazoratidan o‘tkazilganida skripkaning ko‘z ilg‘amas joylariga yashiringan hamda xalqaro pochta deklaratsiyasida ko‘rsatilmagan, qiymati 36 million so‘mlik, og‘irligi 86,4 gramm tilla buyumlar borligi aniqlandi.
Ma’lumot o‘rnida, 2013-yilda Bern shahrida imzolangan Xalqaro pochta ittifoqining pochta jo‘natmasi reglamenti bayonnomasi va Umumjahon pochta konvensiyasiga muvofiq, pochta jo‘natmasi orqali yuborilayotgan barcha tovarlar xalqaro pochta deklaratsiyasida to‘liq qayd etilishi shartligi ko‘rsatilgan, shuningdek, pochta jo‘natmasi orqali zargarlik buyumlarini yuborish taqiqlangan.
Izoh (0)