Toshkent shahrida bugun, 8-sentyabr kuni Xalqaro Nordik universiteti (Nordic International University)ning tantanali ochilishi bo‘lib o‘tdi. Bu haqda “Daryo” muxbiri xabar berdi.
Finlyandiyaning ta’lim sohasidagi ilg‘or yutuqlariga asoslangan holda tashkil etilgan ushbu xalqaro universitetning ochilishi munosabati bilan Finlyandiya Respublikasi delegatsiyasi, oliy ta’lim muassasalari rektorlari, ta’lim tizimi va keng jamoatchilik vakillari tashrif buyurdi.
Finlyandiyaning O‘zbekistondagi elchisi Ilkka Raisanen boshchiligidagi delegatsiyaga ushbu davlatning mamlakatdagi faxriy konsuli Alisher Jo‘rayev va Vazirlar Mahkamasi huzuridagi Ta’lim sifatini nazorat qilish davlat inspeksiyasi mas’ullari hamrohlik qildi. Nufuzli mehmonlar Xalqaro Nordik Universitetida ehtirom bilan kutib olindi.
Tadbirni universitet rektori, iqtisodiyot fanlari doktori, professor Sherzod Mustafakulov kirish so‘zi bilan ochib, universitetning maqsadlari, strategik hamkorlari, kelgusida talabalar uchun yaratiladigan zamonaviy imkoniyatlar bilan tanishtirdi. Respublikada belgilangan ta’lim yo‘nalishlari bo‘yicha yuqori malakali zamonaviy kadrlar tayyorlash, ta’lim sifatini yaxshilash, sohaga doir ilg‘or xorijiy tajribalarni joriy etish, yoshlarning amaliy fanlar bo‘yicha bilim va ko‘nikmalarini shakllantirish, oliy ta’lim – ilm-fan – ishlab chiqarish bilan uzviy integratsiyasini jadallashtirish borasidagi maqsad-vazifalarga to‘xtaldi.
Prezident Adminstratsiya rahbari o‘rinbosari, Prezident matbuot kotibi Sherzod Asadov ochilish marosimida so‘zga chiqib, ushbu universitet O‘zbekiston ta’lim tizimi rivojiga ulkan hissa qo‘shishini qayd etib o‘tdi.
Ochilish marosimida Finlyandiyaning O‘zbekistondagi faxriy konsuli Alisher Jo‘rayev Xalqaro Nordik Universiteti Shimoliy Yevropa davlatlari, xususan Finlyandiya modeli asosida tashkil etilgan O‘rta Osiyoda yagona bo‘lgan xususiy universitet ekanligini e’tirof etdi. Universitetning tashkil etilishi Shimoliy Yevropa mamlakatlarining nufuzli oliy ta’lim muassasalarida yo‘lga qo‘yilgan ilg‘or tajribalar, innovatsion ta’lim modellari, o‘quv reja va dasturlari asosida iqtisodiyotning real sektor ehtiyojlarini hisobga olgan holda yuqori malakali mutaxassislarni tayyorlashga katta hissa qo‘shishiga ishonch bildirdi.
Tadbirda so‘z olganlar barcha yoshlar va ustozlar, universitet jamoasini yangi ta’lim maskani faoliyati bilan qutlab, katta ishonch bildirdi va muvaffaqiyatlar tiladi.
Finlyandiyaning O‘zbekistondagi elchisi Ilkka Raisanen ham universitet kelajagi borasida iliq fikrlar bildirdi, rahbariyat va jamoani samimiy tabrikladi. Finlyandiya delegatsiya bilan har tomonlama manfaatli masalalar yuzasidan muzokaralar bo‘lib o‘tdi.
Ma’lumot uchun, Xalqaro Nordik Universiteti yoshlarga O‘zbekistonda turib xalqaro darajadagi bilimlarni egallash imkonini beradi. 2022-yilning 27-may kuni Toshkent shahrida O‘zbekiston-Finlyandiya tashqi ishlar vazirlarining siyosiy maslahatlar bo‘yicha 10-yig‘ilishida Shimoliy Yevropa mamlakatlarining ta’lim sohasidagi ilg‘or yutuqlariga asoslangan ushbu zamonaviy xususiy oliy ta’lim tashkilotini tashkil etish bo‘yicha kelishuvlarga erishildi.
Ushbu oliygoh Toshkent shahrida Finlyandiyaning Kareliya amaliy fanlar universiteti (UAS), Helsingin Suomalainen Yhteiskoulu (SYK) umumta’lim maktabi, “Nokia” transmilliy korporatsiyasi, Finnish Water Forum tashkiloti va ISKU kompaniyalarining bevosita qo‘llab-quvvatlashlari negizida Finlyandiyaning ta’lim sohasidagi ilg‘or yutuqlariga asoslangan holda faoliyat boshladi.
Universitet respublikada zamonaviy 8 ta ta’lim yo‘nalishi bo‘yicha yuqori malakali mutaxassislar tayyorlash, oliy ta’lim – ilm-fan – ishlab chiqarish bilan uzviy integratsiyasini jadallashtirishni o‘z oldiga maqsad qilib qo‘ygan. Ta’limning global tendensiyalari, kadrlarga bo‘lgan talablar va yoshlarning kelajak umidlarini tahlil qilgan holda Iqtisodiyot, Moliya, Biznesni boshqarish, Sanoatni boshqarish, Boshlang‘ich ta’lim, Maktabgacha ta’lim, Xorijiy til va adabiyoti: ingliz tili, Kompyuter injiniringi yo‘nalishlarida raqobatbardosh kadrlar tayyorlaydi. Ya’ni, biznesning barcha bo‘g‘inlarida faoliyat yuritishni istagan, top menejer, iqtisodchi-konsultant, xalqaro moliyaviy tahlilchi, sanoat tarmoqlarini boshqaruvchi, IT bo‘yicha kompleks masalalarni yechish, xorijiy tillarni o‘rganish va ta’lim tizimida faoliyat yuritish istagidagi yoshlarga xalqaro sifatli oliy ta’lim olishlariga ko‘maklashadi.
Xalqaro Nordik Universitetining asosiy strategik hamkorlaridan biri – Finlyandiyaning Kareliya amaliy fanlar universitetidir. Ta’lim dasturlari va metodologiyasi, nou-xau, ta’limni boshqarish tizimi, o‘qituvchilar malakasini oshirish va boshqa sohalarda Kareliya UAS bilan istiqbolli hamkorlik rejalashtirilgan.
Finlyandiyaning transmilliy texnologik korporatsiyasi hisoblangan Nokia Xalqaro Nordik universitetiga o‘z strategik maqsadlarini amalga oshirishda asosiy hamkorlardan biridir. Bizness-inkubator, xorijda stajirovka, master-klasslar tashkil etishda yaqindan yordam beradi.
Shuningdek, kelgusida yanada kuchliroq hamjamiyatni yaratish, yosh kadrlarni o‘qitish va salohiyatini birlashtirish orqali tizimlarga innovatsiyalar kiritish, bulutli mahalliy yechimlar taqdim etish, jamiyatning taraqqiyotiga katta turtki bo‘ladigan yangi ilovalar ustida ishlash imkonini beradi.
Helsingin Suomalainen Yhteiskoulu (SYK) umumta’lim maktabi o‘z o‘quvchilarini milliy imtihonga yoki Xalqaro bakalavr diplomiga tayyorlaydi. Har ikkalasi ham o‘quvchilarga universitetga kirish malakasi va imkoni beradi. Ayniqsa, IB (Xalqaro bakalavr) talabalarga dunyodagi deyarli har qanday universitetga kirish uchun noyob imkoniyat beradi. Kelgusida universitetda ushbu maktab bilan hamkorlikda Xalqaro Nordik fin maktabi tashkil etiladi.
Shuningdek, universitetning xalqaro hamkorlari – Finnish Water Forum va ISKU kompaniyalari talabalarning o‘quv amaliyotlarini o‘z bazalarida tashkil etishga ko‘maklashadi. ISKU kompaniyasi oliygoh va uning qoshida tashkil etilishi rejalashtirilgan maktab binolari dizayni, o‘quv va boshqa jihozlari hamda aksessuarlarini fin talablari asosida tashkil etish bo‘yicha strategik hamkordir. Universitetga Finlandiyadagi eng yaxshi tajriba, dizayn va texnologiyalar asosida zamonaviy kampusni loyihalash va barpo etishda yordam beradi. Universitet Talabalar shaharchasi O‘zbekiston va butun Markaziy Osiyo uchun chinakam fin o‘quv binolari dizayni va o‘quv xonalari, laboratoriyalar hamda o‘quv mebellari va aksessuarlari bilan tanishish uchun ochiq osmon ostidagi ko‘rgazma zali bo‘lib xizmat qiladi.
Universitet talabalarga qator imkoniyatlarni taqdim etadi. 1-4-kurslarda o‘qish davomida ingliz, rus tillaridan tashqari fin tili mukammal o‘rgatiladi. Barcha kurslar bo‘yicha ta’lim yo‘nalishidan qat’iy nazar yozgi ta’tilda tanlov asosida Finlyandiya, Shvetsiya, Norvegiya va Daniya kabi davlatlarda ish va sayohat (work and travel) dasturlarida qatnashish imkoniyati beriladi. 2+2, 3+1 qo‘shma dasturlari asosida 2-kursdan keyin o‘qishni Finlyandiya universitetlarida davom ettirib, ikki tomonlama (double degree) diplom olish mumkin. Bakalavr bosqichidan so‘ng hamkor xorijiy davlatlardagi yetakchi kompaniyalarda ishlash yoki o‘z biznes start-up loyihalarini amalga oshirish imkoniyatini ham taqdim etiladi.
Oliygohda mahalliy hamda xorijiy professor-o‘qituvchilar, chet el biznes amaliyotchilari talabalarni natijalarga qadar olib boradilar. Xalqaro hamkorlar ko‘magida xorijda stajirovka, ish o‘rganish, master-klass, startaplarni rivojlantirish, kelajakda xorijda ishga joylashtirishga ko‘maklashiladi. Bakalavriat bosqichini muvaffaqiyatli (yuqori GPA ko‘rsatkichi bilan) tugatganlar uchun magistraturani Finlyandiyada imtiyoz asosida o‘qib kelish imkoniyatlari beriladi.
Universitet, haqli ravishda, fin va o‘zbek hamkorligining ilk yirik natijasi, Finlyandiya oliy ta’lim tizimining O‘zbekistondagi yagona aksi, Toshkentdagi birinchi ta’lim klasteridir.
Izoh (0)