Тошкент шаҳрида бугун, 8-сентябр куни Халқаро Нордик университети (Нордиc International University)нинг тантанали очилиши бўлиб ўтди. Бу ҳақда «Дарё» мухбири хабар берди.
Финляндиянинг таълим соҳасидаги илғор ютуқларига асосланган ҳолда ташкил этилган ушбу халқаро университетнинг очилиши муносабати билан Финляндия Республикаси делегацияси, олий таълим муассасалари ректорлари, таълим тизими ва кенг жамоатчилик вакиллари ташриф буюрди.
Финляндиянинг Ўзбекистондаги элчиси Илкка Раисанен бошчилигидаги делегацияга ушбу давлатнинг мамлакатдаги фахрий консули Алишер Жўраев ва Вазирлар Маҳкамаси ҳузуридаги Таълим сифатини назорат қилиш давлат инспекцияси масъуллари ҳамроҳлик қилди. Нуфузли меҳмонлар Халқаро Нордик Университетида эҳтиром билан кутиб олинди.
Тадбирни университет ректори, иқтисодиёт фанлари доктори, профессор Шерзод Мустафакулов кириш сўзи билан очиб, университетнинг мақсадлари, стратегик ҳамкорлари, келгусида талабалар учун яратиладиган замонавий имкониятлар билан таништирди. Республикада белгиланган таълим йўналишлари бўйича юқори малакали замонавий кадрлар тайёрлаш, таълим сифатини яхшилаш, соҳага доир илғор хорижий тажрибаларни жорий этиш, ёшларнинг амалий фанлар бўйича билим ва кўникмаларини шакллантириш, олий таълим – илм-фан – ишлаб чиқариш билан узвий интеграциясини жадаллаштириш борасидаги мақсад-вазифаларга тўхталди.
Президент Админстрация раҳбари ўринбосари, Президент матбуот котиби Шерзод Асадов очилиш маросимида сўзга чиқиб, ушбу университет Ўзбекистон таълим тизими ривожига улкан ҳисса қўшишини қайд этиб ўтди.
Очилиш маросимида Финляндиянинг Ўзбекистондаги фахрий консули Алишер Жўраев Халқаро Нордик Университети Шимолий Европа давлатлари, хусусан Финляндия модели асосида ташкил этилган Ўрта Осиёда ягона бўлган хусусий университет эканлигини эътироф этди. Университетнинг ташкил этилиши Шимолий Европа мамлакатларининг нуфузли олий таълим муассасаларида йўлга қўйилган илғор тажрибалар, инновацион таълим моделлари, ўқув режа ва дастурлари асосида иқтисодиётнинг реал сектор эҳтиёжларини ҳисобга олган ҳолда юқори малакали мутахассисларни тайёрлашга катта ҳисса қўшишига ишонч билдирди.
Тадбирда сўз олганлар барча ёшлар ва устозлар, университет жамоасини янги таълим маскани фаолияти билан қутлаб, катта ишонч билдирди ва муваффақиятлар тилади.
Финляндиянинг Ўзбекистондаги элчиси Илкка Раисанен ҳам университет келажаги борасида илиқ фикрлар билдирди, раҳбарият ва жамоани самимий табриклади. Финляндия делегация билан ҳар томонлама манфаатли масалалар юзасидан музокаралар бўлиб ўтди.
Маълумот учун, Халқаро Нордик Университети ёшларга Ўзбекистонда туриб халқаро даражадаги билимларни эгаллаш имконини беради. 2022 йилнинг 27 май куни Тошкент шаҳрида Ўзбекистон-Финляндия ташқи ишлар вазирларининг сиёсий маслаҳатлар бўйича 10-йиғилишида Шимолий Европа мамлакатларининг таълим соҳасидаги илғор ютуқларига асосланган ушбу замонавий хусусий олий таълим ташкилотини ташкил этиш бўйича келишувларга эришилди.
Ушбу олийгоҳ Тошкент шаҳрида Финляндиянинг Карелия амалий фанлар университети (УАС), Helsingin Suomalainen Yhteiskoulu (SYK) умумтаълим мактаби, «Nokia» трансмиллий корпорацияси, Финниш Water Форум ташкилоти ва ИСКУ компанияларининг бевосита қўллаб-қувватлашлари негизида Финляндиянинг таълим соҳасидаги илғор ютуқларига асосланган ҳолда фаолият бошлади.
Университет республикада замонавий 8 та таълим йўналиши бўйича юқори малакали мутахассислар тайёрлаш, олий таълим – илм-фан – ишлаб чиқариш билан узвий интеграциясини жадаллаштиришни ўз олдига мақсад қилиб қўйган. Таълимнинг глобал тенденциялари, кадрларга бўлган талаблар ва ёшларнинг келажак умидларини таҳлил қилган ҳолда Иқтисодиёт, Молия, Бизнесни бошқариш, Саноатни бошқариш, Бошланғич таълим, Мактабгача таълим, Хорижий тил ва адабиёти: инглиз тили, Компьютер инжиниринги йўналишларида рақобатбардош кадрлар тайёрлайди. Яъни, бизнеснинг барча бўғинларида фаолият юритишни истаган, топ менежер, иқтисодчи-консултант, халқаро молиявий таҳлилчи, саноат тармоқларини бошқарувчи, IT бўйича комплекс масалаларни ечиш, хорижий тилларни ўрганиш ва таълим тизимида фаолият юритиш истагидаги ёшларга халқаро сифатли олий таълим олишларига кўмаклашади.
Халқаро Нордик Университетининг асосий стратегик ҳамкорларидан бири – Финляндиянинг Карелия амалий фанлар университетидир. Таълим дастурлари ва методологияси, ноу-хау, таълимни бошқариш тизими, ўқитувчилар малакасини ошириш ва бошқа соҳаларда Карелия УАС билан истиқболли ҳамкорлик режалаштирилган.
Финляндиянинг трансмиллий технологик корпорацияси ҳисобланган Nokia Халқаро Нордик университетига ўз стратегик мақсадларини амалга оширишда асосий ҳамкорлардан биридир. Бизнесс-инкубатор, хорижда стажировка, мастер-класслар ташкил этишда яқиндан ёрдам беради.
Шунингдек, келгусида янада кучлироқ ҳамжамиятни яратиш, ёш кадрларни ўқитиш ва салоҳиятини бирлаштириш орқали тизимларга инновациялар киритиш, булутли маҳаллий ечимлар тақдим этиш, жамиятнинг тараққиётига катта туртки бўладиган янги иловалар устида ишлаш имконини беради.
Helsingin Suomalainen Yhteiskoulu (SYK) умумтаълим мактаби ўз ўқувчиларини миллий имтиҳонга ёки Халқаро бакалавр дипломига тайёрлайди. Ҳар иккаласи ҳам ўқувчиларга университетга кириш малакаси ва имкони беради. Айниқса, ИБ (Халқаро бакалавр) талабаларга дунёдаги деярли ҳар қандай университетга кириш учун ноёб имконият беради. Келгусида университетда ушбу мактаб билан ҳамкорликда Халқаро Нордик фин мактаби ташкил этилади.
Шунингдек, университетнинг халқаро ҳамкорлари – Финниш Water Форум ва ИСКУ компаниялари талабаларнинг ўқув амалиётларини ўз базаларида ташкил этишга кўмаклашади. ИСКУ компанияси олийгоҳ ва унинг қошида ташкил этилиши режалаштирилган мактаб бинолари дизайни, ўқув ва бошқа жиҳозлари ҳамда аксессуарларини фин талаблари асосида ташкил этиш бўйича стратегик ҳамкордир. Университетга Финландиядаги энг яхши тажриба, дизайн ва технологиялар асосида замонавий кампусни лойиҳалаш ва барпо этишда ёрдам беради. Университет Талабалар шаҳарчаси Ўзбекистон ва бутун Марказий Осиё учун чинакам фин ўқув бинолари дизайни ва ўқув хоналари, лабораториялар ҳамда ўқув мебеллари ва аксессуарлари билан танишиш учун очиқ осмон остидаги кўргазма зали бўлиб хизмат қилади.
Университет талабаларга қатор имкониятларни тақдим этади. 1-4-курсларда ўқиш давомида инглиз, рус тилларидан ташқари фин тили мукаммал ўргатилади. Барча курслар бўйича таълим йўналишидан қатъий назар ёзги таътилда танлов асосида Финляндия, Швеция, Норвегия ва Дания каби давлатларда иш ва саёҳат (wорк анд травел) дастурларида қатнашиш имконияти берилади. 2+2, 3+1 қўшма дастурлари асосида 2-курсдан кейин ўқишни Финляндия университетларида давом эттириб, икки томонлама (double degree) диплом олиш мумкин. Бакалавр босқичидан сўнг ҳамкор хорижий давлатлардаги етакчи компанияларда ишлаш ёки ўз бизнес старт-уп лойиҳаларини амалга ошириш имкониятини ҳам тақдим этилади.
Олийгоҳда маҳаллий ҳамда хорижий профессор-ўқитувчилар, чет эл бизнес амалиётчилари талабаларни натижаларга қадар олиб борадилар. Халқаро ҳамкорлар кўмагида хорижда стажировка, иш ўрганиш, мастер-класс, стартапларни ривожлантириш, келажакда хорижда ишга жойлаштиришга кўмаклашилади. Бакалавриат босқичини муваффақиятли (юқори ГПА кўрсаткичи билан) тугатганлар учун магистратурани Финляндияда имтиёз асосида ўқиб келиш имкониятлари берилади.
Университет, ҳақли равишда, фин ва ўзбек ҳамкорлигининг илк йирик натижаси, Финляндия олий таълим тизимининг Ўзбекистондаги ягона акси, Тошкентдаги биринчи таълим кластеридир.
Изоҳ (0)