O‘zbekistonlik shaxmatchi Umida Omonova o‘smirlar o‘rtasidagi g‘arbiy Osiyo chempionatida g‘olib bo‘ldi

Qirg‘izistonda Western Asia Chess Championship—2022 xalqaro musobaqasi bo‘lib o‘tmoqda.

Chempionatda Hindiston, O‘zbekiston, Qozog‘iston, Tojikiston va Qirg‘iziston kabi 6 davlatdan 20 yoshdan oshmagan 30 nafarga yaqin o‘g‘il-qiz shaxmatchilar ishtirok etmoqda.

O‘zbekistonlik shaxmatchi Umida Omonova G20-Rapid guruhida g‘alaba qozondi.  Omonova guruhning 7 turida 6 ochko jamg‘arishga muvaffaq bo‘ldi.

Umidadan tashqari G20-Rapid guruhida O‘zbekiston sharafini Marjona Malikova, Barchinoy Shokirjonova, Oksana Slopoguzova, Robiyaxon Sardorova himoya qildi. O20-Rapid guruhida esa Muhammadali Abdurahmonov ishtirok etdi.

Eslatib o‘tamiz, Umida Omonova Butunjahon shaxmat Olimpiadasida O‘zbekiston ayollar terma jamoasi safida ishtirok etgandi.