Украина президенти Владимир Зеленский Лиз Трасс Буюк Британия бош вазири лавозимида мулоқот қилган биринчи чет эл етакчисига айланди, деб ёзади Meduza.
«Бу Украина учун катта шараф», — деди Зеленский кечки мурожаатида.
Трасс Зеленскийга у «тўлиқ қўллаб-қувватланиши»ни, Украина эса узоқ муддатли истиқболда Буюк Британиянинг кўмагига умид қилиши мумкинлигини тасдиқлаган, дейилади Британия ҳукумати хабарида. Шунингдек, Трасс Зеленскийнинг Украинага ташриф буюриш таклифини қабул қилган.
Трасснинг чет эл раҳбарлари орасидаги иккинчи суҳбатдоши АҚШ президенти Жо Байден бўлди.
Лиз Трасс ҳукмрон Консерватив партия етакчилиги учун курашда ғолиб чиқиб, 6 сентябрь куни Буюк Британиянинг янги бош вазирига айланди. Ундан аввалги ҳукумат раҳбари, партия ичидаги курашлар натижасида истеъфога чиққан Борис Жонсон жамоатчилик орасида Украинани қўллаб-қувватловчи энг фаол дунё етакчиларидан бири эди ва у уруш даврида Киевга бир неча марта борган эди.
Июль охирида Британия ташқи ишлар вазири лавозимида ишлаб юрган Лиз Трасс бош вазир этиб сайланса, у биринчи бўлиб Украина президенти Владимир Зеленскийга қўнғироқ қилиб, ўз қўллаб-қувватловини билдиришини маълум қилган эди.
Изоҳ (0)