Rossiya AQSH va Yevropa sanksiyalari tufayli uzoqroq va chuqurroq iqtisodiy retsessiyaga yuz tutishi mumkin, bu esa mamlakat iqtisodiyoti uchun yillar davomida tayanib kelgan tarmoqlarni xavf ostiga qo‘yadi. Bu haqda Bloomberg Rossiya hukumatining ichki hisobotiga tayanib yozmoqda.
Retsessiya — vaqtinchalik iqtisodiy pasayish davri bo‘lib, bu davrda savdo va sanoat faoliyati qisqaradi, odatda ikki chorakda yalpi ichki mahsulotning pasayishi bilan belgilanadi.
Ayni vaqtda dunyoda iqtisodiy faollikning sezilarli pasayish davri kuzatilmoqda. Retsessiya odatda ishlab chiqarish va investitsiyalar hajmining, korxonalar foydasining pasayishiga va ishsizlikning oshishiga olib keladi.
Hisobotda keltirilgan uchta ssenariydan ikkitasi kelgusi yilda Rossiyada iqtisodiy retsessiya tezlashishini va iqtisodiyot Ukrainada harbiy maxsus operatsiya boshlanishidan oldingi darajaga faqat o‘n yildan keyin qaytishini ko‘rsatadi.
“Inertial” ssenariy kelgusi yilda iqtisodiyot o‘zining maksimal pasayishiga — 2021-yil darajasidan 8,3 foizga past bo‘lishini nazarda tutadi. “Stress” ssenariysiga ko‘ra, 2024-yilda pasayish 2023-yilga nisbatan 11,9 foizni tashkil qiladi.
Barcha ssenariylar sanksiyalar bosimi kuchayganini hisobga oladi va ularga ko‘proq mamlakatlar qo‘shilish ehtimoli bor.
Hukumat hisobotida aytilishicha, Yevropaning Rossiya neft va gazidan keskin chekinishi Kremlning o‘z bozorini ta’minlash qobiliyatiga putur yetkazishi mumkin.
Hisobotda Rossiyada mutaxassislar yetishmasligining iqtisodiyotga ta’siri ham qayd etilgan. Hujjat mualliflariga ko‘ra, 2025-yilga borib 200 minggacha IT-mutaxassislari mamlakatni tark etishi mumkin, bu esa Rossiyani “aqlli” odamlar tark etishini ortib borishi haqidagi birinchi rasmiy prognozdir.
Nafaqat Rossiya, balki unga qarshi sanksiyalar joriy etayotgan davlatlar ham iqtisodiy retsessiyaga yuz tutmoqda.
Masalan, “Bundesbank” Germaniyada inflyatsiya kuzda “ikki xonali” songa yetishi mumkinligidan ogohlantirdi.
Britaniyada inflyatsiya 40 yil ichida birinchi marta 10 foizdan oshdi. Bloomberg tomonidan so‘ralgan ekspertlar yevrohududda retsessiya xavfi 2020-yil noyabridan beri eng yuqori darajaga ko‘tarilganini ma’lum qildi.
Izoh (0)