O‘zbekistonda 2023–2024-yillarda 190 gektardan ortiq maydondagi ekologik talablarga javob bermaydigan 29 ta chiqindi poligonlari yopiladi. Bu haqda Davlat ekologiya qo‘mitasi matbuot xizmati xabar berdi.
Qayd etilishicha, prezidentning 2022-yil 11-avgustdagi “Sanitar tozalash ishlarini tashkil etish va aholi punktlarida tozalikni ta’minlash bo‘yicha qo‘shimcha chora-tadbirlar to‘g‘risidagi qaroriga muvofiq, 2023–2024-yillarda qattiq maishiy chiqindi poligonlarini rekultivatsiya qilish bo‘yicha manzilli dastur tasdiqlandi.
Ushbu manzilli dastur doirasida Davlat ekologiya qo‘mitasi maishiy chiqindi poligonlarini rekultivatsiya qilish ishlariga buyurtmachi hisoblanadi.
Xarajatlar Qoraqalpog‘iston Respublikasi budjeti va viloyatlar mahalliy byudjetlari hamda Ekologiya, atrof-muhitni muhofaza qilish va chiqindilar bilan bog‘liq ishlarni amalga oshirish jamg‘armasi mablag‘lari hisobidan teng miqdorda moliyalashtiriladi.
Rekultivatsiya qilingan hududlar mahalliy ijro etuvchi hokimiyat organlarining yer zaxiralariga qaytariladi.
Ma’lumot uchun, bugungi kunda respublika hududida 1 000 ga yer maydoniga yaqin 197 ta maishiy chiqindi poligonlari mavjud bo‘lib, ularning faoliyatini 2028-yilgacha to‘xtatish belgilangan.
Izoh (0)