Toshkentda 6-sentabr kuni Shanxay hamkorlik tashkilotining axborot xavfsizligi bo‘yicha ilmiy-ekspert forumi bo‘lib o‘tadi, deb xabar bermoqda O‘zA.
Tadbir Prezident huzuridagi Strategik va mintaqalararo tadqiqotlar instituti tomonidan Axborot texnologiyalari va kommunikatsiyalarni rivojlantirish vazirligi hamda SHHT Mintaqaviy aksilterror tuzilmasi Ijroiya qo‘mitasi bilan hamkorlikda o‘tkazilmoqda.
Xorijiy ishtirokchilarni onlayn ulash orqali gibrid formatda tashkil etilayotgan axborot xavfsizligi masalalari bo‘yicha muloqotda SHHTga a’zo davlatlarning tegishli vazirlik, idoralari, ilmiy-akademik va tahliliy doiralari vakillaridan iborat 30 nafardan ziyod yetakchi ekspertlar jamlanishi kutilmoqda.
Ishtirokchilarning nufuzli tarkibi raqamlashtirish sohasidagi so‘nggi tendensiyalar va yutuqlarni muhokama qilish, shuningdek SHHT makonida inson huquqi va huquq ustuvorligini ta’minlash sharoitida axborot va kiber xavfsizlik sohasidagi tahdidlarga qarshi kurashish bo‘yicha ilg‘or milliy tajribani taqdim etish imkonini beradi.
Mazkur forumni o‘tkazish tashabbusi Shavkat Mirziyoyev tomonidan 2021-yil 17-sentabr kuni SHHTning Dushanbe sammitida ilgari surilgan edi.
Ushbu forum ishtirokchilarga axborot xavfsizligini ta’minlash sohasidagi xavf-xatarlarga qarshi kurashishga oid yagona siyosatni shakllantirish bo‘yicha aniq taklifoar, amaliy tavsiyalar ishlab chiqish, shuningdek SHHT mamlakatlari fuqarolari axborotdan erkin va hech qanday to‘siqsiz foydalanishini ta’minlash bo‘yicha umumiy yondashuvlarni kelishib olish imkonini beradi.
Umuman, mazkur tadbir mintaqaviy hamkorlikni mustahkamlash va SHHTga a’zo davlatlarning axborot va kiber makondagi xatarlarga qarshi kurash borasidagi salohiyatini oshirish imkonini beradi.
Mavzuga doir:
- “SHHTning Samarqand sammitida Belarus, Eron va Mongoliya kuzatuvchi, Turkiya va Turkmaniston maxsus taklif qilingan mehmon sifatida ishtirok etadi” — O‘zbekistonning SHHT ishlari bo‘yicha milliy koordinatori
- Toshkentda SHHTga a’zo davlatlar mudofaa vazirlari qo‘shma kommyunike imzoladi
- SHHT mamlakatlari inflyuenserlari O‘zbekiston turizm salohiyatini targ‘ib qilmoqda
Izoh (0)