Ўзбекистонда 2023–2024 йилларда 190 гектардан ортиқ майдондаги экологик талабларга жавоб бермайдиган 29 та чиқинди полигонлари ёпилади. Бу ҳақда Давлат экология қўмитаси матбуот хизмати хабар берди.
Қайд этилишича, президентнинг 2022 йил 11 августдаги «Санитар тозалаш ишларини ташкил этиш ва аҳоли пунктларида тозаликни таъминлаш бўйича қўшимча чора-тадбирлар тўғрисидаги қарорига мувофиқ, 2023–2024 йилларда қаттиқ маиший чиқинди полигонларини рекултивация қилиш бўйича манзилли дастур тасдиқланди.
Ушбу манзилли дастур доирасида Давлат экология қўмитаси маиший чиқинди полигонларини рекултивация қилиш ишларига буюртмачи ҳисобланади.
Харажатлар Қорақалпоғистон Республикаси бюджети ва вилоятлар маҳаллий бюджетлари ҳамда Экология, атроф-муҳитни муҳофаза қилиш ва чиқиндилар билан боғлиқ ишларни амалга ошириш жамғармаси маблағлари ҳисобидан тенг миқдорда молиялаштирилади.
Рекултивация қилинган ҳудудлар маҳаллий ижро этувчи ҳокимият органларининг ер захираларига қайтарилади.
Маълумот учун, бугунги кунда республика ҳудудида 1 000 га ер майдонига яқин 197 та маиший чиқинди полигонлари мавжуд бўлиб, уларнинг фаолиятини 2028 йилгача тўхтатиш белгиланган.
Изоҳ (0)