Ijtimoiy tarmoqlarda bosh vazir Abdulla Aripovning sentabr oyi uchun pensiya va nafaqalarni muddatidan oldin to‘lab berish yuzasidan topshirig‘i ijrosi muhokamalarga sabab bo‘lmoqda. Pensiya jamg‘armasi holatga munosabat bildirdi.
Qayd etilishicha, Vazirlar Mahkamasining tegishli topshirig‘iga asosan pensiya va nafaqa oluvchilarga Mustaqillik bayrami oldi ko‘tarinki kayfiyat ulashish maqsadida muddatidan avval mablag‘larni plastik kartalarga yuklab berish topshirilgan.
Mazkur topshiriq ijrosi bo‘yicha yetarli mablag‘lar 2022-yil 1-sentabrga qadar tijorat banklarning hisob varaqlariga moliyalashtirib berilgan.
Jamg‘armaning tuman (shahar) bo‘limlari tomonidan joriy yil sentabr uchun 4,2 million nafar fuqarolarga pensiya va nafaqa to‘lovi qaydnomalari 30-avgustga qadar to‘liq shakllantirib, axborot tizimlari orqali AT “Xalq banki” va tegishli tijorat banklariga yetkazilgan.
Joriy yilning 2-sentabr holatiga pensiya va nafaqa to‘lovi uchun jami talab etilgan 4 milliard 298,6 million so‘m mablag‘dan 3 milliard 881,2 million so‘m (yoki 90 foiz) moliyalashtirib berilgan.
Jumladan, naqd pulda oluvchilar uchun 1 milliard 831,9 million so‘m (yoki oylik talabning 81 foizi) AT “Xalq banki”ga hamda bank plastik kartalari orqali oluvchilarga to‘liq miqdorda 2 milliard 49,3 million so‘m (yoki 100 foiz) tijorat banklariga moliyalashtirilib pensiya va nafaqa oluvchilarning bank plastik kartalariga to‘liq yuklab berilgan.
“Shuningdek, prezidentning tegishli farmoniga asosan Mustaqillik bayramida ketma-ket 4 kun dam olish belgilangani munosabati bilan AT “Xalq banki” tomonidan sentabr oyida naqd pulda pensiya va nafaqa oluvchilar uchun to‘lovlar joriy yilning 5-sentabr sanasidan amalga oshirilishini ma’lum qilamiz”, — deyiladi xabarda.
Izoh (0)