Ўзбекистон президенти Шавкат Мирзиёев фармонига кўра, 100 ёшдан ошган 14 нафар ўзбекистонлик «Шуҳрат» медали билан тақдирланганди. Фарғона вилояти ҳокими фарғоналик отахонга медални топширди. Бу ҳақда «Дарё» мухбири хабар берди.
Фарғона вилояти ҳокими Хайрулло Бозоров «Шуҳрат» медали билан тақдирланган Холмурод ота Қуроловни қутлаш учун Данғара туманидаги Гулистон қишлоғига борди.
Вилоят ҳокими 106 ёшли отахонни байрам билан қутлаб, унга президент номидан давлат мукофоти ҳамда байрам совғаларини топширган.
Тўкин дастурхон атрофида ўтган самимий суҳбат чоғида вилоят ҳокими унинг меҳнатлари президент томонидан эътироф этилиб, «Шуҳрат» медалига муносиб кўрилганини таъкидлаб, отахоннинг кўксига ушбу медални тақиб қўйган.
Отахон вилоят ҳокимига ёшлик даври, иш фаолияти давомида бошдан кечирган қизиқ воқеалар ҳақида гапириб берди. Ҳозирда отахон фарзандлари, 100 дан зиёд невара, эваралари қуршовида, юртимизда ҳукм сураётган тинчликни улуғлаб, дуо қилиб ҳаёт кечирмоқда.
Изоҳ (0)