Germaniyaning Xalqaro hamkorlik bo‘yicha jamg‘arma kassalari fondi O‘zbekiston banklari faoliyati bo‘yicha o‘tkazgan tadqiqot natijalarini e’lon qildi. Bu haqda Markaziy bank xabar berdi.
Germaniyaning Xalqaro hamkorlik bo‘yicha jamg‘arma kassalari fondi — German Sparkassenstiftung mutaxassislari tomonidan O‘zbekistonda aholining moliyaviy xizmatlardan foydalanish holati hamda mijozlarning banklarga bo‘lgan ishonchi bo‘yicha bozor tadqiqoti o‘tkazildi.
Ushbu tadqiqot aholining moliyaviy munosabatlarga bo‘lgan umumiy fikri, banklar faoliyati, mijozlarning banklarga ishonchi va bank xizmatlaridan qoniqish darajasi hamda aholining moliyaviy savodxonligi ko‘rsatkichlarini o‘zida aks ettiruvchi ma’lumotlarni qamrab olgan.
Jumladan:
- tadqiqotda ishtirokchilarining 98 foizi moliyaviy xizmatlardan foydalanishini;
- 76 foiz respondentlar o‘zlarining moliyaviy savodxonlik bo‘yicha darajasini o‘rtacha deb hisoblashini;
- 83 foiz respondentlar banklarning faoliyati 2016-yilga nisbatan yaxshilanganligini;
- 61 foiz respondentlar so‘nggi 2 yilda O‘zbekistondagi banklarga bo‘lgan ishonch oshganligini;
- 86 foiz respondentlar banklar tomonidan kredit bo‘yicha barcha xarajatlarning oshkor etilishi hamda yuzaga kelgan kredit qarzdorligi to‘g‘risida birinchi navbatda, ogohlantirish berilishi bankka bo‘lgan ishonchning oshishiga xizmat qilishini qayd etib o‘tgan.
Shu bilan birga, o‘rganish natijalari mijozlarning bank xizmatlaridan qoniqish darajasini oshirish yuzasidan bank tizimi va faoliyatida e’tibor qaratilishi lozim bo‘lgan masalalar mavjudligini ko‘rsatmoqda.
Mazkur tadqiqot natijalari bo‘yicha olingan xulosa va ma’lumotlar bank sohasini rivojlantirish, fuqarolarning bank tizimiga bo‘lgan ishonchini yanada mustahkamlash uchun xizmat qiladi.
Bundan tashqari xizmatlar sifatini yaxshilash va aholining moliyaviy savodxonlik darajasini oshirish borasida joriy hamda kelgusida bajariladigan chora-tadbirlar yo‘nalishlarini belgilashda muhim ahamiyatga ega.
1992 yilda tashkil etilgan Jamg‘arma kassalari fondi — Germaniya davlat jamg‘armasi bo‘lib, u iqtisodiy va ijtimoiy sohalarda rivojlanayotgan mamlakatlardagi moliyaviy institutlarni qo‘llab-quvvatlaydi.
Jamg‘arma dunyoning 64 mamlakatida, shu jumladan, O‘zbekistonda ham 2003-yildan buyon faoliyat ko‘rsatib kelmoqda. Shu kunga qadar fond tomonidan 100 dan ortiq davlatda 200 dan ortiq loyihalar muvaffaqiyatli amalga oshirilgan.
Izoh (0)