Ayni vaqtda Ko‘ksaroyda mustaqillikning 31 yilligi munosabati bilan mukofotlangan o‘zbekistonliklarni taqdirlash marosimida prezident Shavkat Mirziyoyev Butunjahon shaxmat olimpiadasida g‘olib bo‘lgan o‘zbekistonlik shaxmatchilar haqida gapirdi. Bu haqda “Daryo” muxbiri xabar bermoqda.
“Hindistonda shaxmat bo‘yicha bo‘lib o‘tgan olimpiadada ishtirok etgan O‘zbekiston terma jamoasining yigitlari musobaqa chempioni bo‘lgani so‘nggi yillarda yoshlarimizga berilayotgan e’tiborning mevasi. Qizlarimiz ham musobaqada anchagina faol ishtirok etishganini aytib o‘tish zarur.
Bundan tashqari, 46-Butunjahon shaxmat olimpiadasining O‘zbekistonda o‘tkazilishi ham sportga qaratayotgan e’tiborimizning natijasidir. Dunyo bizni shaxmatda tan olayotganini ham aytib o‘tish darkor”, — deydi davlat rahbari.
Prezident harbiy soha bo‘yicha ham qator mukofotlarni topshirish bo‘yicha farmonga imzo chekkanini eslab o‘tdi.
“Hamisha viloyatlarga borib, ular bilan suhbatlashganimda o‘zim uchun kim qanday ishlayotganini belgilab olaman. Yoki bo‘lmasa ularning ijtimoiy tarmoq, televideniye yoki gazetalarda aytadigan so‘zlarini o‘qib faxrlanaman, o‘zim uchun bilib olaman”, — deydi Shavkat Mirziyoyev.
Davlat rahbari, shuningdek, viloyatlarga tashrifi davomida insonlar bilan suhbat qilishi haqida gapirdi.
“Viloyatlarga tashrifim davomida insonlar bilan gaplashaman, ulardan qanday muammosi bor ekanligini so‘raganimda hatto yoshlar ham “janob prezident, bizda mana bunday muammolar bor”, deb aytadi. Shu orqali ham qator muammolar hal bo‘ladi”, — dedi prezident.
Izoh (0)