Айни вақтда Кўксаройда мустақилликнинг 31 йиллиги муносабати билан мукофотланган ўзбекистонликларни тақдирлаш маросимида президент Шавкат Мирзиёев Бутунжаҳон шахмат олимпиадасида ғолиб бўлган ўзбекистонлик шахматчилар ҳақида гапирди. Бу ҳақда «Дарё» мухбири хабар бермоқда.
«Ҳиндистонда шахмат бўйича бўлиб ўтган олимпиадада иштирок этган Ўзбекистон терма жамоасининг йигитлари мусобақа чемпиони бўлгани сўнгги йилларда ёшларимизга берилаётган эътиборнинг меваси. Қизларимиз ҳам мусобақада анчагина фаол иштирок этишганини айтиб ўтиш зарур.
Бундан ташқари, 46-Бутунжаҳон шахмат олимпиадасининг Ўзбекистонда ўтказилиши ҳам спортга қаратаётган эътиборимизнинг натижасидир. Дунё бизни шахматда тан олаётганини ҳам айтиб ўтиш даркор», — дейди давлат раҳбари.
Президент ҳарбий соҳа бўйича ҳам қатор мукофотларни топшириш бўйича фармонга имзо чекканини эслаб ўтди.
«Ҳамиша вилоятларга бориб, улар билан суҳбатлашганимда ўзим учун ким қандай ишлаётганини белгилаб оламан. Ёки бўлмаса уларнинг ижтимоий тармоқ, телевидение ёки газеталарда айтадиган сўзларини ўқиб фахрланаман, ўзим учун билиб оламан», — дейди Шавкат Мирзиёев.
Давлат раҳбари, шунингдек, вилоятларга ташрифи давомида инсонлар билан суҳбат қилиши ҳақида гапирди.
«Вилоятларга ташрифим давомида инсонлар билан гаплашаман, улардан қандай муаммоси бор эканлигини сўраганимда ҳатто ёшлар ҳам «жаноб президент, бизда мана бундай муаммолар бор», деб айтади. Шу орқали ҳам қатор муаммолар ҳал бўлади», — деди президент.
Изоҳ (0)