Ro‘ziqul Berdiyev: Agar jamoa natijalari men tufayli yomon bo‘lsa, ketishga tayyorman

“Nasaf” bosh murabbiyi Ro‘ziqul Berdiyev “Lokomotiv”ga qarshi o‘yindan so‘ng (0:0) “Chempionat”ga o‘z fikrlarini bildirib o‘tdi.

Raqib ko‘pchilik bo‘lib himoyalandi. Buni biz kutgandik. Shuning uchun qanotlarimiz ko‘proq ishlashi kerak edi. Shunga qaramasdan vaziyatlar yarata oldik. Raqib darvozasiga yo‘l topa olmadik, bu esa bizning 2 ochko yo‘qotishimizga sabab bo‘ldi. Albatta, ulardan yangi murabbiy, shu sabab ular qanday taktikadan foydalanishini bilmasdik.

Futbolchilar birinchi bo‘limda maydonda “piyoda yurgani” haqida

Shuning uchun ularni almashtirdik. Ikkinchi bo‘limda ancha jonlandik. O‘yinchilar joyida ham o‘zgartirishlar kiritdik.

Muxlislar o‘zlariga qarshi muxlislik qilgani haqida

Bir narsani aytib o‘tmoqchiman, o‘zimizni muxlislar o‘zimizga qarshi turishdi. Kechirasizlar-u, bu kechirib bo‘lmaydigan narsa. Muxlislar har qanday holatda ham o‘z jamoasiga sodiq bo‘lishi kerak. Bu juda xunuk narsa, oddiy qilib aytganda — bu xoinlik. Agar men tufayli “Nasaf”ni natijalari yomon bo‘lsa, buning muammoli joyi yo‘q. Agar boshqa murabbiy jamoani yaxshiroq boshqaradi desa, men ertagayoq qo‘limni ko‘tarib, ketishim mumkin. Lekin jamoaga qarshi muxlislik qilish qashqadaryoliklar uchun yaxshi narsamas. Har qanday holatda ham jamoani qo‘llab-quvvatlash kerak.

Legionerlarning o‘yini qoniqtirmayotgani haqida

Oldin ham aytganman, legionerlar mahalliy futbolchilardan kuchli bo‘lsa o‘ynaydi, bo‘lmasa zaxiraga olinadi. Kim yaxshi holatda bo‘lsa, o‘sha futbolchini maydonga tushiryapmiz.

So‘nggi daqiqalarda hakam oldiga yugurib chiqqani haqida

Men jiddiylashdim. Balki hakamga qarshi qo‘pollik qilgandirman. Ikkinchi bo‘lim o‘rtasida to‘rtinchi hakam oldimga kelib, VAR ishlayotgani haqida ogohlantirib ketdi. Lekin o‘sha vaziyatda hakamning yoniga borganimda, oxirgi o‘n daqiqada VAR o‘chib qolganini ma’lum qildi. Mana sizlarga hakamlarni aytgan gapi.

Hakamlardan jabr ko‘rayotgani haqida

Bundan ko‘p jabr ko‘ryapmiz. Lekin foydasi yo‘q. Chunki 3 ochkoni hech kim qaytarib bermaydi. Nechchinchi o‘yindir, ko‘ryapsizlar holatni. Bu borada bir necha bor murojaat qilganmiz. Biroq hakam jabr ko‘rishi mumkin, bizga esa foydasi bo‘lmaydi. “Nasaf” ariza bersa ham, hakam jazolanadi, jamoaga esa buni hech qanaqa foydali joyi bo‘lmaydi.

Ro‘ziqul Berdiyev, “Nasaf” bosh murabbiyi