Chirchiq shahrida oqova suv tozalash inshootini rekonstruksiya qilish bo‘yicha shartnoma imzolandi, deb xabar bermoqda “O‘zsuvta’minot” matbuot xizmati.
Ma’lum qilinishicha, “O‘zsuvta’minot” AJ, Alkataş Inşaat ve Taahhüt qo‘shma korxonasi va Mesmer-East MCHJ o‘rtasida Chirchiq shahridagi oqova suv tozalash inshootini rekonstruksiya qilish bo‘yicha qiymati 22,2 million dollarga teng shartnoma imzolangan.
Ayni paytda oqova suv tozalash inshootining o‘rnatilgan kunlik quvvati 80 ming metr kubni tashkil etib, rekonstruksiya ishlari amalga oshirilgandan so‘ng bu ko‘rsatkich 130 ming metr kubgacha oshishi ko‘zda tutilgan.
Bundan tashqari, “Toshkent viloyatining 7 ta shahar va tumanlarida ichimlik va oqova suv tizimlarini qurish va rekonstruksiya qilish” loyihasi doirasida 12,8 kilometr yangi oqova suv tarmoqlarini tortish hamda 16 kilometr oqova suv tarmoqlarini rekonstruksiya qilish ham rejalashtirilgan.
Buning natijasida shahar aholisining markazlashgan oqova suv xizmatlari bilan qamrab olinganlik darajasi hozirgi 61 foizdan 84 foizga yetkaziladi.
Osiyo taraqqiyot banki ishtirokidagi mazkur loyiha doirasidagi ishlarni 2025-yilda to‘liq yakunlash ko‘zda tutilgan.
Izoh (0)