Чирчиқдаги оқова сув тозалаш иншооти 22,2 млн долларга реконструкция қилинади

Чирчиқ шаҳрида оқова сув тозалаш иншоотини реконструкция қилиш бўйича шартнома имзоланди, деб хабар бермоқда «Ўзсувтаъминот» матбуот хизмати.

Маълум қилинишича, «Ўзсувтаъминот» АЖ, Алкатаş Инşаат ве Тааҳҳüт қўшма корхонаси ва Месмер-East МЧЖ ўртасида Чирчиқ шаҳридаги оқова сув тозалаш иншоотини реконструкция қилиш бўйича қиймати 22,2 миллион долларга тенг шартнома имзоланган.

Айни пайтда оқова сув тозалаш иншоотининг ўрнатилган кунлик қуввати 80 минг метр кубни ташкил этиб, реконструкция ишлари амалга оширилгандан сўнг бу кўрсаткич 130 минг метр кубгача ошиши кўзда тутилган.

Бундан ташқари, «Тошкент вилоятининг 7 та шаҳар ва туманларида ичимлик ва оқова сув тизимларини қуриш ва реконструкция қилиш» лойиҳаси доирасида 12,8 километр янги оқова сув тармоқларини тортиш ҳамда 16 километр оқова сув тармоқларини реконструкция қилиш ҳам режалаштирилган.

Бунинг натижасида шаҳар аҳолисининг марказлашган оқова сув хизматлари билан қамраб олинганлик даражаси ҳозирги 61 фоиздан 84 фоизга етказилади.

Осиё тараққиёт банки иштирокидаги мазкур лойиҳа доирасидаги ишларни 2025 йилда тўлиқ якунлаш кўзда тутилган.