Farg‘ona viloyatida havoni ifloslantirayotgan Gips Group National faoliyati to‘xtatildi. Bu haqda viloyat ekologiya boshqarmasi xabar berdi.
Qayd etilishicha, shu kunlarda Davlat ekologiya qo‘mitasi tuzilgan ishchi guruh Sho‘rsuv shaharchasi hududida joylashgan sanoat korxonalarining ekologiya va atrof-muhitga ta’siri yuzasidan o‘rganishlar olib bormoqda.
Ishchi guruh Gips Group National MCHJ faoliyati bilan yaqinda tanishganda, ushbu MCHJning tegirmon sexining 2-tashlama manbasidan olingan havo namunalarining tahlil natijalariga ko‘ra, tarkibidagi zararli moddalar sement changi miqdori 19,9-marta ruxsat etilgan chegaraviy tashlamadan ortgani hamda tashlama manbasining chang va gaz ushlash qurilmasi 80 foizni tashkil etishi aniqlangan.
Shu sababli sex faoliyati sud qarori asosida to‘xtatilgan.
Eslatib o‘tamiz, iyul oyida ham Sho‘rsuv shaharchasi hududida joylashgan 5 ta korxona qatorida Gips Group National faoliyati vaqtinchalik to‘xtatilib, tabiatni muhofaza qilishga oid qonunchilik talablari bajarilishi bo‘yicha majburiy ko‘rsatmalar berilgandi.
Mavzuga doir: Aholi “Navoiyazot”dan chiqayotgan tutunlardan norozi. Ekoboshqarma holat yuzasidan o‘rganish olib bordi
Izoh (0)