Farg‘ona viloyati delegatsiyasi xorijda vaqtinchalik mehnat qilayotgan vatandoshlar holidan xabar olish va “Yangi O‘zbekistonda el aziz, inson aziz” shiori ostida nishonlanayotgan mustaqillik bayramini birgalikda tantana qilish uchun Rossiyaga tashrif buyurdi.
Delegatsiya a’zolari dastlab Samara viloyatining yirik sanoat shahri Tolyattida bo‘lib, “Innovatsion rivojlanish va klaster tashabbuslari markazi” – “Jigulevskaya Dolina” texnoparki faoliyati bilan tanishdi.
Shaharning investitsion salohiyati, IT yo‘nalishi va boshqa tarmoqlarda amalga oshirilayotgan ilg‘or loyihalar taqdimoti o‘tkazildi. Farg‘ona viloyatida ham ushbu sohalarda bir qator yutuqlarga erishilayotgani qayd etilib, “Qo‘qon” erkin iqtisodiy zonasi va “Tolyatti” maxsus iqtisodiy zonasi o‘rtasidagi hamkorlik imkoniyatlari ko‘rib chiqildi. Migratsiya masalalarida “Avtovaz”, “Ferroni Injiniring” va “Sladosti” korxonalari bilan kelishuvlarga erishildi.
Shuningdek, viloyat hokimining mahalliy sanoatni rivojlantirish masalalari bo‘yicha yordamchisi Akmal Po‘latov boshchiligidagi delegatsiya a’zolari Samara viloyati Savdo-sanoat palatasida rossiyalik mas’ullar va ishbilarmon doiralar vakillari bilan uchrashdi. Unda ikki viloyat o‘rtasida turli yo‘nalishlarda manfaatli hamkorlik munosabatlarini yo‘lga qo‘yish haqida so‘z bordi.
Investitsiyaviy loyihalarni amalga oshirish va migratsiya bo‘yicha aloqalarni kengaytirishga, xususan, qurilish sohasida faoliyat olib boruvchi “Polyana” MCHJ va “Krasniy Klyuch” AJ korxonalari bilan hamkorlikni yo‘lga qo‘yishga kelishib olindi.
Shu kuni Samara shahridagi “Samarskiy Stroyfarfor”da mehnat faoliyatini olib borayotgan 300 ga yaqin o‘zbekistonlik fuqarolar holidan xabar olindi. Vatandoshlar uchun bayram dasturxoni tuzalib, osh tarqatildi.
Samara shahridagi “Zarya” nomidagi madaniyat uyida vatandoshlarimiz uchun viloyat san’atkorlari ishtirokida mustaqilligimizning 31 yillik tantanalariga bag‘ishlangan konsert dasturi tashkil etildi. Farg‘onalik taniqli xonandalar Akmal Sadixonov, Qodirjon Ahmedov, Nodirbek Egamberdiyev, Izzatbek Qo‘qonov ijrosida vatanni, sevgi-muhabbatni tarannum etgan kuy-qo‘shiqlar, “Farg‘ona zebolari” raqs jamoasining chiroyli chiqishlari yig‘ilganlarga ko‘tarinki kayfiyat ulashdi.
Izoh (0)