Фарғона вилояти делегацияси хорижда вақтинчалик меҳнат қилаётган ватандошлар ҳолидан хабар олиш ва «Янги Ўзбекистонда эл азиз, инсон азиз» шиори остида нишонланаётган мустақиллик байрамини биргаликда тантана қилиш учун Россияга ташриф буюрди.
Делегация аъзолари дастлаб Самара вилоятининг йирик саноат шаҳри Толяттида бўлиб, «Инновацион ривожланиш ва кластер ташаббуслари маркази» – «Жигулевская Долина» технопарки фаолияти билан танишди.
Шаҳарнинг инвестицион салоҳияти, IT йўналиши ва бошқа тармоқларда амалга оширилаётган илғор лойиҳалар тақдимоти ўтказилди. Фарғона вилоятида ҳам ушбу соҳаларда бир қатор ютуқларга эришилаётгани қайд этилиб, «Қўқон» эркин иқтисодий зонаси ва «Толятти» махсус иқтисодий зонаси ўртасидаги ҳамкорлик имкониятлари кўриб чиқилди. Миграция масалаларида «Автоваз», «Феррони Инжиниринг» ва «Сладости» корхоналари билан келишувларга эришилди.
Шунингдек, вилоят ҳокимининг маҳаллий саноатни ривожлантириш масалалари бўйича ёрдамчиси Акмал Пўлатов бошчилигидаги делегация аъзолари Самара вилояти Савдо-саноат палатасида россиялик масъуллар ва ишбилармон доиралар вакиллари билан учрашди. Унда икки вилоят ўртасида турли йўналишларда манфаатли ҳамкорлик муносабатларини йўлга қўйиш ҳақида сўз борди.
Инвестициявий лойиҳаларни амалга ошириш ва миграция бўйича алоқаларни кенгайтиришга, хусусан, қурилиш соҳасида фаолият олиб борувчи «Поляна» МЧЖ ва «Красний Ключ» АЖ корхоналари билан ҳамкорликни йўлга қўйишга келишиб олинди.
Шу куни Самара шаҳридаги «Самарский Стройфарфор»да меҳнат фаолиятини олиб бораётган 300 га яқин ўзбекистонлик фуқаролар ҳолидан хабар олинди. Ватандошлар учун байрам дастурхони тузалиб, ош тарқатилди.
Самара шаҳридаги «Заря» номидаги маданият уйида ватандошларимиз учун вилоят санъаткорлари иштирокида мустақиллигимизнинг 31 йиллик тантаналарига бағишланган концерт дастури ташкил этилди. Фарғоналик таниқли хонандалар Акмал Садихонов, Қодиржон Аҳмедов, Нодирбек Эгамбердиев, Иззатбек Қўқонов ижросида ватанни, севги-муҳаббатни тараннум этган куй-қўшиқлар, «Фарғона зеболари» рақс жамоасининг чиройли чиқишлари йиғилганларга кўтаринки кайфият улашди.
Изоҳ (0)