Munosabatlarini ko‘z-ko‘z qilmagani uchun ham tinch va baxtli yashaydigan Enrike Iglesias va Anna Kurnikovaning muhabbat siri nimada?

AdMe nashri ko‘p yillar davomida shou-biznes olamidagi eng kuchli va yopiq juftliklardan biri hisoblangan Iglesias va Kurnikova o‘rtasidagi munosabatlar tarixi haqida ko‘proq ma’lumot olishga qaror qildi.

Lotin amerikalik mashhur qo‘shiqchi bilan tanishishidan oldin Anna Kurnikova allaqachon mashhur va juda muvaffaqiyatli tennischi edi. Misol uchun, 2000-yilda sportchi WTA reytingida 8-o‘rinni egallaydi. Anna juftlik bahslarida dunyoning 1-raqamli o‘yinchisiga aylanadi. Biroq u yakkalik bahslarida hech qachon chempion bo‘lmagan. Mashhurligining shon-shuhrat cho‘qqisida uning ismi Google’dagi eng ko‘p qidirilgan nomlardan biri bo‘lgan

2000-yillarning boshlarida Enrike o‘z vatanida ham, Ispaniyada ham, xorijda ham juda mashhur xonanda edi. U bir nechta albom chiqaradi, bir necha marta jahon bo‘ylab konsert gastrollari uyushtiradi. Va o‘sha paytdagi eng mashhur singllaridan biri “Bailamos” — Uill Smit ijrosidagi “Yovvoyi, yovvoyi G‘arb” filmining saundtreki edi. Kinofilm muvaffaqiyatli bo‘lmaydi, lekin qo‘shiq Qo‘shma Shtatlarda 1-raqamli xitga aylanadi.

2001-yilda Iglesias o‘zining ingliz tilidagi ikkinchi “Escape” albomini chiqaradi. To‘plamdan shu nomdagi qo‘shiqqa klip suratga olishga qaror qilinadi. Rejissor Deyv Meyers Anna Kurnikovani klipda suratga tushishga taklif qiladi.

“Escape” klipida Enrike va Anna o‘rtasidagi bir nechta bo‘sa olish sahnalari mavjud. Shuning uchun klip ekranlarga chiqqandan so‘ng, ommaviy axborot vositalari darhol yulduzlarni sevishganlarga chiqarishadi. Aytgancha, suratga olish paytida qo‘shiqchi Annani o‘pishdan bosh tortgani haqida mish-mishlar tarqaladi.

Ammo Enrikening o‘zi bu gaplarni rad etadi:

Ular Annani o‘pishni xohlamaganimni yozishibdi, go‘yo u gerpes bilan kasallanganmish, ammo bunday emas. Annani o‘pmaganimda ahmoq bo‘lardim. U ajoyib va ​​juda yoqimtoy qiz.

Ushbu videoklip chiqqandan so‘ng jurnalistlar doimiy ravishda yulduzlarni birga suratga olib, juftlikni qo‘lga tushirishga harakat qilishadi. Ammo qo‘shiqchi va tennischi ular o‘rtasida sevgi borligini tasdiqlamaydi, hech qanday izoh bermaydi va birgalikda jamoatchilikka ko‘rinishmaydi.

Faqat 2002-yilda Enrike va Anna MTV Awards taqdirlash marosimida paydo munosabatlariga oydinlik kiritadi. Sevishganlar sifatida qizil gilamda birinchi marta suratga tushganlarida ular jilmayib, qo‘l ushlashadi.

Ko‘p vaqt o‘tmay ular Iglesiasning ko‘chmas mulki bo‘lgan Mayamida birga yashay boshlaydilar. Shu tarzda ular yashirin hayot tarzini davom ettiradilar. Mazkur yillar davomida Anna va Enrike munosabatlarini qonuniylashtirganmi, to‘y o‘tkazganmi yoki yo‘qmi, bu haqda rasmiy ma’lumot yo‘q.

2011-yilda Anna “Ayollar salomatligi” jurnaliga bergan intervyusida shunday degan edi:

Nikoh men uchun muhim emas. Men baxtliman – muhimi shu. Men samimiy bo‘lishga, bir-birimizga ishonishga va bir-birimizni to‘liq hurmat qilishga ishonaman.

O‘sha yili Enrike ham intervyusida shunday deydi:

Men shaxsiy hayotim iloji boricha maxfiy bo‘lishini xohlayman. Ayniqsa, o‘zing kabi mashhur va e’tibor markazida bo‘lgan odam bilan yashasang.

Keyinchalik Iglesias va Kurnikovaning ajralishi haqida mish-mishlar tarqaldi, ammo bu ma’lumot tasdiqlanmadi. Ammo 17 yillik munosabatlardan so‘ng, qo‘shiqchi hamma narsani tashlab, Anna bilan ajrashishni xohlagan davrlari ham bo‘lganini tan oladi. Ammo sevgilisini qaytarish va mojaroni yumshatish uchun Enrike “Enamorado Por Primera Vez” qo‘shig‘ini yozadi.

Men bu qo‘shiqni kechirim so‘rash uchun yozganman. Yozish — bu mening terapiyam, deydi ispaniyalik macho. Bu harakat ish berdi va ular birgalikda baxtli yashashda davom etishdi.

Enrike va Anna birinchi marta 2017-yilning dekabrida farzandli bo‘lishdi — egizaklar Nikolay va Lyusi dunyoga keldi. Qizig‘i shundaki, sportchining homiladorligini ko‘pchilik bilmay qolgan va xonanda Budapeshtdagi konserti chog‘ida bolalari tug‘ilishi haqida ma’lum qilgan. Muxlislar bu xabardan hayratda qolishadi.

Farzandli bo‘lgandan so‘ng, er-xotin ijtimoiy tarmoqlarda yoqimli oilaviy fotosuratlarni baham ko‘rishni boshladilar.

2020-yilning yanvarida Anna 3-farzandi — qizi Merini dunyoga keltirdi.

Kurnikova o‘zining Instagram’ida eri va bolalari bilan tushgan fotosuratlar va videolarni bo‘lishishiga qaramay, er-xotin shaxsiy hayotlarining tafsilotlarini jurnalistlar bilan muhokama qilishga shoshilmayapti.

Enrikening fikricha, baxtli oilaviy munosabatlar siri oilangiz bilan imkon qadar ko‘proq vaqt o‘tkazishdir.

Hozir men karyeramning o‘z ish jadvalimni xohshimga qarab tanlashim mumkin bo‘lgan bosqichidaman. Ketma-ket 2 haftadan ko‘proq vaqt davomida uydan chiqmasligim ham mumkin, deydi qo‘shiqchi.

U farzandlari dadasining qo‘shiqlarini eshitganda qanday munosabatda bo‘lishlari bilan o‘rtoqlashdi:

Ular har safar qo‘shiqlarimni eshitganlarida ovozimni taniydilar — bu juda zo‘r. Ammo ular “Escape” klipini tomosha qilishganda hech narsani tushunmaganga o‘xshaydi — “Oyim dadamning yonida nima qilyapti? Bu qachon bo‘lgan?” Rostini aytsam, ularning yuzidagi ifodalarni ko‘rish juda maroqli.

Kurnikovaning karyerasiga kelsak, Anna belidagi jiddiy muammolar tufayli 2003-yilda professional tennisdan ketgan. Ungacha vaqti-vaqti bilan u ko‘rgazmalarda va juftlik bahslarida o‘ynab turgandi. Bir muncha vaqt tennischi televideniyeda ham ishlagan. Anna hozir 41 yoshda.

47 yoshli Enrike Iglesias esa hali ham yangi qo‘shiqlarni taqdim etishdan charchamaydi, konsertlar beradi. Ayni paytda u Lotin Amerikasi musiqasining eng ko‘p albomi sotilgan san’atkorlaridan biri — albomining butun dunyo bo‘ylab sotuvi 70 million nusxadan oshadi.

Aytgancha, 2003-yilda Iglesias o‘ng yonog‘idagi xolni olib tashlash uchun operatsiya qildirganini ko‘pchilik bilmaydi. Qo‘shiqchi shifokorlarning vaqt o‘tishi bilan xol saraton kasalligiga aylanishi mumkinligi haqidagi tashxisidan so‘ng shu qarorga kelgan.