Aktrisa Durdona Tursunboyeva tomoshabinlarga “Otalar so‘zi— aqlning ko‘zi” telenovellasidagi turli obrazlari, shuningdek, “Sardor” serialidagi serjant roli bilan yaxshi tanish. U 12 yildan beri Amerikada istiqomat qilmoqda. “Daryo” muxbiri Nargizaxon Murodova Durdona Tursunboyeva bilan AQSHga ketishining sababi va u yerdagi hayoti haqida suhbatlashdi.
“Men Amerikaga emas, Toshkentga intilganman”
— Asli Qozog‘istonda tug‘ilganman, ammo doim maktabda “Mening orzuyim” mavzusida insho yozdirishsa, “Toshkentga ketib, san’at oliygohida o‘qiyman”, deb yozardim. Chunki juda ko‘plab mashhur san’atkorlar aynan Toshkentdagi san’at oliygohida tahsil olishgani haqida eshitgandim. Niyatim amalga oshib, hech kimning yordamisiz Toshkentga keldim. Ammo qachonlardir AQSHga ketib, hammasini qaytadan boshlayman, deb xayolimga ham keltirmagandim. Amerikaga kelish fikri qayerdan paydo bo‘ldi, nega tavakkal qildim, deb haligacha o‘ylayman. Chunki do‘stlarim bilan hazillashib, Amerika elchixonasiga hujjat topshirgandim. Odamlar bir necha yil harakat qilib qo‘lga kiritadigan vizani men ilk urinishdayoq qo‘lga kiritdim. Hatto vizani qo‘lga olganimda ham ketish fikrim qat’iy emas edi. Bir yillik vizaning uch oyini Toshkentda o‘tkazib, keyin AQSHga kelganman.
“Nima qilib qo‘ydim, deb ich-etimni yeganman”
— Odatda AQSHga kelmoqchi bo‘lganlar viza olishdan avval tanish-bilish izlashga tushishadi. Ammo menda hammasi noodatiy bo‘lgan. Bu yerga 2010-yilning dekabr oyida kelganman. O‘zbekistonda qish u qadar qahraton bo‘lmagani uchun AQSHga kelib, haqiqiy qish qanday bo‘lishini bilgandim. Egnimda yupqa palto, oyog‘imda esa kalta etik kiyib, bu yerni ham Toshkentdek iliq deb o‘ylagan ekanman.
Odamni muzlatib qo‘yadigan sovuqda mehmonxona izlab, eng arzoniga joylashganman. Kuniga 75 dollardan pul to‘lardim. Ishonasizmi, “Nima qilib qo‘ydim”, deb o‘ylayverganimdan tashqariga umuman chiqmaganman. O‘rnimdan ham turgim kelmay, yostiqni quchib yotaverdim. Oxiri uchinchi kun nima bo‘lsa bo‘ldi, deb tashqariga chiqqanman. Yaxshi hamki, aeroportdagi qizlar Nyu-York shtatidagi Queens shahrini ko‘rsatishgan ekan. Bu yerda o‘zbek va rus millatiga mansub odamlar ko‘pligi uchun “Ingliz tilini bilmagan insonlarga bu yerda yashash oson”, deyishgandi. Atrof bilan tanishish uchun ko‘chaning u boshidan bu boshiga qarab yuraverganman. Keyin go‘sht sotadigan do‘konga dutor ilinganini ko‘rib, quvonganimdan ichkariga kirgandim. Bu yerda 30 yil avval AQSHga ko‘chib kelgan buxoroliklar savdo qilishar ekan. Ularning yordami bilan arzon uyga joylashganman.
“Qadoqlovchilikdan zargarlikkacha...”
— AQSHda ish topish qiyin emas. Faqat hammasi birdan osonlikcha bo‘lmaydi. Masalan, AQSHdagi ilk ishim buyurtmalarni qadoqlash bo‘lgan. Ya’ni internet do‘konidagi sotilgan buyumlarni qadoqlash bilan shug‘ullanganman. Undan keyin kompyuter bilan ishlashni boshladim. U do‘kon kosmetik mahsulotlar savdosi bilan shug‘ullanardi. Ishim o‘zimga juda yoqardi, ammo bu ish sog‘lig‘imga salbiy ta’sir etayotganini sezdim.
Ammo o‘sha vaqtda ham ingliz tilidagi kundalik so‘zlardan boshqasini bilmasdim. Manxettenda til o‘rganib, o‘z ustimda ishlashga qaror qildim. U yerda taqinchoqlar savdosi bilan shug‘ullanadigan insonlar bilan tanishdim. Faoliyatim yana ayollar bilan bog‘landi. Zargarlik buyumlarini farqlash, ularga tosh qo‘yish va yasashni o‘rgandim. Ishim o‘zimga zavq bag‘ishlardi. Chunki bolaligimda san’atkor bo‘lmasam, shifokor yoki dizayner bo‘laman, deb orzu qilardim. Taqinchoqlar dizaynerligiga shunchalik qiziqib ketdimki, u hayotimning mazmuniga aylandi. Bu bo‘yicha kurslarda tahsil olib, brilliantlarni farqlashni ham o‘rgandim.
“Turmush o‘rtog‘im til o‘rganishimni istadi”
— Har birimiz Yaratgan chizib bergan taqdir yo‘lidan yurarkanmiz. Men hech qachon AQSHga kelishni va bu yerda yana turmush qurib, farzandli bo‘lishni tasavvur qilmagandim. Manxettenda zargarlik bilan shug‘ullanadigan eronlik inson bilan oila qurdim. Qaynonam, turmush o‘rtog‘im va ikki o‘g‘lim bilan birga yashaymiz. Turmush o‘rtog‘im AQSHdagi yirik tadbirkorlardan biri hisoblanadi. U ancha yillardan buyon brilliantlar savdosi bilan shug‘ullanadi.
Turmush o‘rtog‘im o‘qishimni, til o‘rganishimni istadi. Oz vaqt ichida uning tadbirkorlikdagi partnyoriga aylandim. Ammo o‘g‘limiz tug‘ilgach, faoliyatimni biroz chekladim. Hozir ham ishlar ko‘payib ketsa, turmush o‘rtog‘imga yordamlashaman. Qolgan payt esa uy ishlari va o‘g‘illarim tarbiyasi bilan bandman. Yaqinda O‘zbekistonga borib, katta o‘g‘lim Kamronni ham AQSHga olib keldim. U ham bu yerga moslashyapti.
“Teatr bilan bog‘liq shirin xotiralarim ko‘p”
— O‘ylab qarasam, ilgari hech narsadan qo‘rqmaydigan, tavakkalchi bo‘lgan ekanman. Kutilganidek bo‘lmasa, jabrini faqat o‘zim tortaman-ku, deb tavakkal qilishdan hayiqmasdim. Hozir esa bir qarorga kelishdan avval uzoq o‘ylayman, turmush o‘rtog‘im, hatto bolalarim bilan ham maslahatlashaman. Ba’zi paytlarda ijtimoiy tarmoqlarda O‘zbek milliy akademik drama teatri haqidagi ma’lumotlarni o‘qib, afsuslanaman. Chunki u yerda 13 yil ishladim, teatr bilan bog‘liq shirin xotiralarim juda ko‘p. Turkiyadagi festivalda rejissor Valijon Umarovning “Ayolg‘u” spektakli bilan ishtirok etganmiz. Shodiya To‘xtayeva bilan Fotima va Zuhra rollarini ijro etgandik. O‘shanda katta o‘g‘lim Kamronga homilador edim. Hamkasblarim meni avaylab, barcha qulayliklarni yaratib berishgandi.
AQSHda hamma narsa bor, ammo baribir nimadir yetishmayotgandek tuyuladi. Ba’zan sevimli ishim bilan shug‘ullangim keladi. Bu yerda qolib ketishni istamayotganimni ham ich-ichimdan his qilaman.
“Katta gapirmaslik kerak”
— Ilgari “Otalar so‘zi — aqlning ko‘zi” degan telenovellalar namoyish etilardi. Kinolar bir yilda namoyish etilsa, telenovella har hafta efirga uzatilardi. Ammo ba’zi rejissorlar novellalarga past nazar bilan qarashardi. Men esa telenovellada ko‘p suratga tushadigan aktrisalardan biri edim. Kinorejissorlardan biri “Otalar so‘zida suratga tushmang, bo‘lmasa kinoga ololmaymiz”, degan. Novellani har hafta orziqib kutadigan muxlislar sabab undagi takliflarni rad etishni istamaganman.
Ba’zan dugonalarim qistovi bilan kastinglarga borardim. “Sardor” serialida ham kursdoshim Nigora Karimboyeva bilan borib, birga kasting topshirgandik. “Shaytanat”da ham shunday bo‘lgan.
Odam katta gapirmasligi kerak, deb bekorga aytishmaydi. Bir paytlar telenovellalarni kamsitgan rejissorlar bugun shu ishdan non yeb yurishibdi.
“Etyud nimaligini bilmaganlar sahna yulduzi”
— Teatr va kinoga qaytgim keladi. Ammo oradan shuncha vaqt o‘tdi, endi o‘zimni bu sohada avvalgidek erkin his qilolamanmi, deb o‘ylayman. Keyin hozirgi talablar avvalgidan o‘zgargan. San’at oliygohida o‘qimagan, etyud nima ekanligini bilmagan va umri davomida bitta masalni yodlamaganlar sahna yulduzi bo‘lib yurishibdi. Ularni shunchalik ura-ura bilan ko‘tarishyaptiki, hayron qolaman. Menga bunday ijod qilish yoqmaydi. Hammasi professional bo‘lgani yaxshi.
Yaqinda turmush o‘rtog‘im YouTube’ga joylangan o‘zbek kinosini ko‘rsatib, “Nega sizlardagi hamma aktrisalar bir xil?” deb kuldi. Yo‘q, unday emas, dedim-u, ammo uning gaplarida jon borligini ich-ichimdan his qildim. Ba’zi aktrisalarda o‘ziga xoslik yo‘qolgan. Ayol go‘zal bo‘lishga intiladi, ammo bu bilan o‘zligini yo‘qotib qo‘ymasligi kerak. Amerika va turk filmlarini kuzatib boraman. Bu yerda filtrdan va ortiqcha bo‘yanishdan tiyilishadi. To‘g‘ri, ular ham plastik operatsiyalardan foydalanishadi. Ammo bu yerlarda tabiiylik ko‘proq qadrlanadi.
“AQSH hech kimni o‘zgartirmaydi”
— “Amerika bolaning tarbiyasiga aks ta’sir etadi, shuning uchun uni bu yerga olib kelmayapman”, degan gapni ko‘p eshitaman. To‘g‘ri, hammaning o‘z fikri bor. Ammo, menimcha, AQSH hech kimni o‘zgartirmaydi, bola ham tarbiyani avvalo ota-onasidan oladi. Yaxshi tarbiyalangan bola ko‘chaga chiqib, birdan o‘zgarib qolmaydi.Amerikaliklardan ham o‘rganishimiz kerak bo‘lgan jihatlar juda ko‘p. Bu yerdagilar pul topishni ham, shunga yarasha hordiq chiqarishni ham bilishadi. Keyin AQSHda yoshi ulg‘ayganida o‘qish ham tabiiy hol. Men ham AQSHga kelgach, 5 yildan so‘ng til kurslariga borib, o‘qidim. Hozir ham o‘qiyapman, — deydi O‘zbek milliy akademik drama teatrining sobiq aktrisasi Durdona Tursunboyeva.
Mavzuga doir:
- “Amerika orzular mamlakati emas, bu yerda dollardan boshqa hech narsa yo‘q”. 5 yildan buyon AQSHda yashayotgan teleboshlovchi Ravshan Hakimov bilan suhbat
- AQShga ko‘chib ketgan o‘zbekistonlik mashhurlar (foto)
- Sohib Abbosxon AQShda mehmonxonada suvoqchilik qilgani va qizining so‘zlari uni yig‘latgani haqida gapirdi (video)
- Gulchehra Eshonqulova ilk marta AQShga ketishi sababi, turmush o‘rtog‘idan 13 yosh kattaligi haqidagi gaplardan charchagani haqida gapirdi (video)
Izoh (0)