Қашқадарё вилоятининг Ғузор туманида МФЙ раиси тўққиз гектар ерни 11 миллион 700 минг сўмга сотаётганда қўлга олинди. Бу ҳақда «Дарё» манбаси хабар берди.
Маълум бўлишича, ҳолат Бош прокуратура ҳузуридаги Иқтисодий жиноятларга қарши курашиш департаментининг вилоят бошқармаси ходимлари томонидан фош этилган.
Аниқланишича, тумандаги 55 ёшли МФЙ раисларидан бири маҳалла ҳудудидаги фермер хўжалигига қарашли 9 гектар ер майдонини бошқа бир шахсга олиб бериш учун ундан 11 миллион 700 минг сўм талаб қилган.
«Раис келишилган пулнинг 5 миллион сўмини аввалроқ олган. Қолган 6 миллион 700 минг сўмини МФЙ идорасида олаётган пайтда ашёвий далиллар билан қўлга олинди», — дейди «Дарё» манбаси.
Қўшимча қилинишича, МФЙ раиси Жиноят кодексининг 168-моддаси 3-қисми билан (фирибгарлик) айбли деб топилиб, унга нисбатан жиноят иши қўзғатилган. Шунингдек, раисга қамоқ эҳтиёт чораси қўлланган.
Изоҳ (0)