Toshkentda SHHTga a’zo davlatlar mudofaa vazirlari qo‘shma kommyunike imzoladi

O‘zbekistonning Shanxay hamkorlik tashkilotiga raisligi doirasida 24-avgust kuni Toshkentda tashkilotga a’zo davlatlar mudofaa vazirlarining navbatdagi yig‘ilishi bo‘lib o‘tdi, deb xabar bermoqda “Dunyo” axborot agentligi.

Qayd etilishicha, yig‘ilish avvalida Hindiston, Qozog‘iston, Qirg‘iziston, Pokiston, Rossiya, Tojikiston va O‘zbekiston, shuningdek, SHHTda kuzatuvchi davlat maqomida bo‘lgan Belarus harbiy idoralari rahbarlari Toshkentdagi G‘alaba bog‘ida o‘rnatilgan “Matonat madhiyasi” monumenti poyiga gul qo‘ygan. Tadbir ishtirokchilariga O‘zbekiston Qurolli Kuchlari oliy bosh qo‘mondoni Shavkat Mirziyoyevning murojaatnomasi o‘qib eshittirilgan.

Uchrashuvda xalqaro hamda mintaqaviy xavfsizlikni ta’minlashning dolzarb masalalari yuzasidan fikr almashilgan, mudofaa va xavfsizlik sohasida hamkorlikni mustahkamlash bo‘yicha uzoq muddatli vazifalar belgilab olingan.

Yig‘ilishda so‘zga chiqqan O‘zbekiston mudofaa vaziri Bahodir Qurbonov “Tobora rivojlanib borayotgan SHHT mintaqamizda tinchlik, xavfsizlik va barqarorlikni saqlashga muhim hissa qo‘shib kelmoqda”, — deya ta’kidlagan.

Uchrashuvda SHHTga a’zo davlatlar o‘rtasidagi o‘zaro munosabatlar, tashkilot makonida xavfsizlikni mustahkamlash va barqarorlikni ta’minlash, shu jumladan, COVID-19 pandemiyasining salbiy oqibatlarini bartaraf etishda o‘zaro hamkorlikni davom ettirish masalalari kelishib olingan. Shuningdek, quyidagi masalalar ko‘rib chiqilgan:

• SHHTga a’zo davlatlar o‘rtasidagi do‘stlik va yaxshi qo‘shnichilik munosabatlarini mustahkamlash, mintaqada tinchlik, barqarorlik va osoyishtalikni ta’minlash maqsadida xavfsizlik sohasidagi hamkorlik masalalarini kengaytirish va ko‘maklashishni davom ettirish;
• SHHT va boshqa mintaqaviy hamkor tashkilotlar o‘rtasida amaliy hamkorlikni rivojlantirish;
• tashkilotga a’zo davlatlar Qurolli Kuchlari o‘rtasida o‘zaro do‘stlik va harbiy madaniyat sohasida almashuvni mustahkamlashda muhim platforma bo‘lgan harbiy orkestrlarning “Tinchlik navosi” festivali o‘tkazilishini davom ettirish va boshqa masalalar.

Tadbir so‘ngida SHHTga a’zo davlatlar mudofaa vazirlarining navbatdagi yig‘ilishini 2023-yilda Hindistonda o‘tkazish to‘g‘risida qaror qabul qilingan.