Bo‘zsuv kanali bo‘yiga qurilish chiqindisini ag‘darib ketgan yuk avtomobil haydovchisiga chora ko‘rildi

Ijtimoiy tarmoqlarda “Zangiota tumani ‘Chinor’ va ‘Ulug‘bek’ MFY hududi atrofida axlatlarni ag‘darib ketishmoqda” izohi bilan video xabar tarqatildi.

Mazkur holat yuzasidan Toshkent viloyati IIBB JXX xodimlari tomonidan surishtiruv ishlari olib borilganda, videodagi yuk transport vositasi haydovchisi 1994-yilda tug‘ilgan A.A. ekani (Quyi Chirchiq tumanida yashovchi), u haqiqatan ham Zangiota tumani “Chinor” MFYdan oqib o‘tuvchi Bo‘zsuv kanali bo‘yiga (o‘ziga tegishli bo‘lgan 10H124SA) “Kamaz” rusumli yuk mashinasida qurilish chiqindilarini to‘kib ketgani aniqlandi.

Ushbu holat yuzasidan qonunda belgilangan tartibda huquqbuzarga nisbatan Ma’muriy javobgarlik to‘g‘risidagi kodeksning 91 prem 1 moddasi (belgilanmagan joylarga qattiq maishiy chiqindilarni va qurilish chiqindilarini tashlash, shuningdek, suyuq maishiy chiqindilarni to‘kish) bilan ma’muriy bayonnoma rasmiylashtirilgan.

Yuk mashinasi vaqtincha saqlash uchun jarima maydoniga qo‘yildi.