Jahon sog‘liqni saqlash tashkiloti rahbari Tedros Gebreyesus kechagi bayonotida koronavirusning oldini olishga doir chora-tadbirlar xususida so‘z yuritdi.
Uning qayd etishicha, dunyodagi barcha tibbiyot xodimlari va 60 yoshdan oshgan kishilar COVID-19 ga qarshi vaksina olishi va emlanish qamrovi 70 foizga yetishi zarur.
“Bu insonlar hayotini saqlab qolish va barqaror rivojlanish jarayonini tiklashning eng yaxshi usuli”, — dedi bosh direktor.
Shuningdek, T.Gebreyesusning tahlillariga ko‘ra, joriy yil boshida 34 ta mamlakatda aholining koronavirusga qarshi ommaviy emlanish darajasi 10 foizdan kam bo‘lgan.
Hozirga kelib esa bunday davlatlar soni atigi 10 ta qolgan va ularning aksariyati turli gumanitar vaziyatlarga duch kelgan.
Eslatib o‘tamiz, JSSTning 22-avgust holati bo‘yicha bergan ma’lumotiga ko‘ra, pandemiya boshlanganidan buyon jami 593 million 269 ming nafardan ortiq kishi koronavirus infeksiyasiga chalingan. Ulardan qariyb 6 million 447 ming nafari kasallik oqibatida hayotdan ko‘z yumgan.
Izoh (0)