23-avgust kuni O‘zbekistonning Shanxay hamkorlik tashkilotiga raisligi doirasida Toshkent shahrida tashkilotga a’zo davlatlar Banklararo uyushmasi kengashining 18-yig‘ilishi bo‘lib o‘tadi. Bu haqda Dunyo axborot agentligi xabar qildi.
Qayd etilishicha, yig‘ilish “O‘zmilliybank” AJ raisligida o‘tkaziladi. Anjumanda SHHTga a’zo davlatlarning Banklararo uyushmaga a’zo banklari rahbarlari, shuningdek, SHHT kotibiyati va SHHT Banklararo uyushmasi hamkor banklari, O‘zbekistonning vakolatli vazirlik va idoralari vakillari ishtirok etadi.
Muloqot doirasida SHHTga a’zo davlatlar o‘rtasida savdo va investitsiya hajmi o‘sishini rag‘batlantirish uchun qulay shart-sharoit yaratish, o‘zaro manfaatli sheriklikni yaxshilash maqsadida a’zo banklar o‘rtasida investitsiya, iqtisodiyot sohalari va kadrlar masalasida hamkorlikni kengaytirish, shuningdek, Banklararo uyushmaga a’zo banklarda kadrlar salohiyatini oshirish istiqbolini muhokama qilish ko‘zda tutilgan.
Eslatib o‘tamiz, SHHT Banklararo uyushmasi Hukumat rahbarlari kengashining 2005-yil 26-oktyabrdagi qarori bilan a’zo davlatlar tomonidan qo‘llab-quvvatlanadigan investitsiya loyihalarini moliyalashtirish va bank xizmati ko‘rsatish mexanizmini yaratish maqsadida tuzilgan.
Izoh (0)