Davlat organlarining NNTlar tomonidan xalqaro grantlarni amalga oshirishda hamkorlik qilishiga oid hukumat qarori ijtimoiy tarmoqda ayrim muhokamalarga sabab bo‘lmoqda. Adliya vazirligi holatga munosabat bildirdi. Quyida u to‘lig‘icha havola etildi.
Birinchidan, “Nodavlat notijorat tashkilotlari faoliyatining kafolatlari to‘g‘risida”gi qonunga asosan, davlat NNTlarni qo‘llab-quvvatlash shakllari va shartlarini belgilaydi.
“Nodavlat notijorat tashkilotlari to‘g‘risida”gi qonunga ko‘ra, NNTlarning alohida ijtimoiy foydali dasturlariga davlat ko‘mak ko‘rsatishi mumkin.
Hukumatning yuqorida qayd etilgan qarorining asosiy maqsadi esa, grantlarni amalga oshirishda NNTlarga yordam berish, ularni qo‘llab-quvvatlash, loyihalarning samaradorligini oshirish, shuningdek, ularning manzilli olib borilishiga hissa qo‘shishdir.
Hujjatning biror bir qoidasi NNTlarga xalqaro grantlarni olishda byurokratik to‘siq yoki cheklov o‘rnatishga qaratilmagan, aksincha bu borda NNTlar ko‘mak ko‘rsatishning institutsional asoslarini mustahkamlash ko‘zlangan.
Ikkinchidan, mazkur hujjat bilan oldin amalda bo‘lgan qoidalar, ya’ni aynan grant loyihalari doirasida ishlarni birgalikda samarali tashkil etish uchun NNTlarga ortiqcha yuk emas, ko‘mak nazarda tutilyapti.
Hozir ham NNTlar xalqaro grantlar olib, ularni davlat organlari bilan birgalikda va hamkorlikda hayotga tatbiq etib kelmoqda. Shu bilan birga, NNTlarning xalqaro grantlarini amalga oshirishda davlat organlarining faoliyatida yagona yondashuv bo‘lmagan. Ayrim davlat organlarining NNTlar bilan ishlashi e’tibordan chetda qolib kelgan. Endilikda esa, milliy hamkorni biriktirish orqali davlat organlariga NNTlarga yordam berish majburiyati yuklanmoqda.
Uchinchidan, NNTlarning grant olish jarayonlari bilan bog‘liq faoliyatiga salbiy ta’sir ko‘rsatadigan tartib joriy qilinmadi.
Qonunchilikka muvofiq, NNTlar xalqaro NNTlar bilan to‘g‘ridan to‘g‘ri xalqaro aloqalar o‘rnatishi, hamkorlik to‘g‘risida tegishli bitimlar tuzishi mumkin.
Bunda, xorijiy hamkorlaridan pul mablag‘lari olishni adliya organlari bilan oldindan kelishib olish majburiyati amaldagi “Nodavlat notijorat tashkilotlari to‘g‘risida”gi qonunning 8-moddasida belgilab qo‘yilgan.
Ushbu qarorda xorijiy manbalardan olingan mablag‘lar doirasida grant loyihalari amalga oshirilish jarayonida, faqat va faqat davlat organlari zimmalariga qo‘shimcha vazifalar yuklatilmoqda, yo‘l xaritalari tuziladi va ijrosi birgalikda ta’minlanadi va monitoring qilinadi.
Qarorga asosan hamkor davlat organini tanlashda NNTlarning fikri, taklifi ustunlikka ega bo‘ladi.
Hujjatning 11-bandida milliy hamkor NNTga grant loyihasining sifatli, o‘z vaqtida amalga oshirilishida amaliy yordam berish uchun mas’ul ekanligi, bunda milliy hamkorning NNT ichki ishlariga aralashishiga yo‘l qo‘yilmasligi nazarda tutilgan.
Qayd etish lozimki, davlat organlari grant bo‘yicha tegishli rejalarni ishlab chiqishda, NNTlarga zarur ma’lumotlarni vaqtida taqdim etishda, grant doirasidagi muammolarni zudlik bilan hal etishda NNTlarga yordam beradi.
Loyihalarning yanada samarador bo‘lishi uchun, zarurat bo‘lsa, tavsiyava takliflar berish bilan cheklanadi xolos.
Grantlar ijrosiga, amalga oshirish usuliga davlat organlarining hech qanday aloqasi yo‘q. NNTlar bu borada mustaqil, ularning grantlar bo‘yicha pozitsiyasini o‘zgartirishga yo‘l qo‘yilmaydi.
Jarayonlar huquqiy jihatdan mustahkamlandi, davlat organlarining NNTlarga amaliy ko‘mak berish bo‘yicha mas’uliyati oshirildi, ularning vazifalari aniq belgilab berildi.
Qolaversa, qarordan ko‘zlangan maqsad – har bir grant haqiqiy samara berishiga erishish va grant doirasidagi hamda davlat organlarining tegishli sohadagi faoliyati hamohangligini ta’minlashga bo‘lgan harakat O‘zbekistonning aynan tashqi ko‘makka yanada ko‘proq ochilayotganligidan dalolat beradi.
Qonunlarda belgilangan NNTlar faoliyatiga oid kafolatlar ta’minlanadi.
Fuqarolik jamiyatining huquqiy asoslarini izchil takomillashtirish, NNTlarga ko‘mak berish, davlat va jamiyat boshqaruvida ularning faol ishtirok etishini vazirlik qo‘llab-quvvatlaydi.
Izoh (0)