23 август куни Ўзбекистоннинг Шанхай ҳамкорлик ташкилотига раислиги доирасида Тошкент шаҳрида ташкилотга аъзо давлатлар Банклараро уюшмаси кенгашининг 18-йиғилиши бўлиб ўтади. Бу ҳақда Дунё ахборот агентлиги хабар қилди.
Қайд этилишича, йиғилиш «Ўзмиллийбанк» АЖ раислигида ўтказилади. Анжуманда ШҲТга аъзо давлатларнинг Банклараро уюшмага аъзо банклари раҳбарлари, шунингдек, ШҲТ котибияти ва ШҲТ Банклараро уюшмаси ҳамкор банклари, Ўзбекистоннинг ваколатли вазирлик ва идоралари вакиллари иштирок этади.
Мулоқот доирасида ШҲТга аъзо давлатлар ўртасида савдо ва инвестиция ҳажми ўсишини рағбатлантириш учун қулай шарт-шароит яратиш, ўзаро манфаатли шерикликни яхшилаш мақсадида аъзо банклар ўртасида инвестиция, иқтисодиёт соҳалари ва кадрлар масаласида ҳамкорликни кенгайтириш, шунингдек, Банклараро уюшмага аъзо банкларда кадрлар салоҳиятини ошириш истиқболини муҳокама қилиш кўзда тутилган.
Эслатиб ўтамиз, ШҲТ Банклараро уюшмаси Ҳукумат раҳбарлари кенгашининг 2005 йил 26-октябрдаги қарори билан аъзо давлатлар томонидан қўллаб-қувватланадиган инвестиция лойиҳаларини молиялаштириш ва банк хизмати кўрсатиш механизмини яратиш мақсадида тузилган.
Изоҳ (0)