19-avgust kuni Toshkent shahrida O‘zbekistonning Shanxay hamkorlik tashkilotiga raisligi doirasida tashkilotga a’zo davlatlar Xavfsizlik kengashlari kotiblarining 17-uchrashuvi o‘z ishini boshladi, deb xabar qilmoqda “Dunyo” axborot agentligi.
Qayd etilishicha, uchrashuvda a’zo davlatlar va kuzatuvchi davlatlar Xavfsizlik kengashlari kotiblari, shuningdek, SHHT mintaqaviy aksilterror tuzilmasi kotibiyati va Ijroiya qo‘mitasining vakillari ishtirok etmoqda.
Kun tartibiga muvofiq, xalqaro va mintaqaviy xavfsizlikni ta’minlash, jumladan, terrorizm, ekstremizm, qurol va giyohvand moddalarning noqonuniy savdosiga qarshi kurashish hamda axborot xavfsizligini ta’minlash masalalari ko‘rib chiqiladi.
SHHT Xavfsizlik kengashlari kotiblarining uchrashuvi 2004-yildan buyon o‘tkazib kelinmoqda va ko‘p tomonlama hamkorlikning muvofiqlashtiruvchi-maslahat mexanizmi hisoblanadi. Birinchi uchrashuv 2004-yil 4-iyun kuni Toshkent shahrida bo‘lib o‘tgan.
Eslatib o‘tamiz, SHHTga a’zo davlatlar Xavfsizlik kengashlari kotiblarining 16-yig‘ilishi 2021-yil 23-iyun kuni Tojikistonning Dushanbe shahrida bo‘lib o‘tgandi. Mavzuga doir:- Toshkentda tashkil etilgan Shanxay hamkorlik tashkilotining Xotin-qizlar forumi — suratlarda
- O‘zbekiston va Qozog‘iston IIVlari transchegaraviy jinoyatlarga qarshi kurashishda hamkorlikni kuchaytiradi
- Toshkentda SHHTga a’zo davlatlar ichki ishlar va jamoat xavfsizligi vazirlarining to‘rtinchi kengashi bo‘lib o‘tadi
