Латофатли актриса, нафақат ўзбек кино оламида ўз ўрнига эга бўлган, балки чет эл кинофильмларида суратга тушиб, муваффақиятга эришган, «Менинг акам бўйдоқ», «Орзудаги аёл», «Макрли дунё», «Сўнгги истак» кинокартиналаридаги роли билан мухлисларнинг қалбидан жой олган Ситора Фармонова 20 август куни 38 ёшни қарши олди. Шу муносабат билан «Дарё» нашри актрисанинг ҳаёт ва ижод йўли ҳақида маълумот беради.
Дизайнерликда таҳсил олиб, актрисаликда муваффақиятга эришган юлдуз
Латофатли актриса Ситора Фармонова 1984 йилнинг 20 августида Бухоро шаҳрида туғилган. У оилада уч нафар фарзанднинг тўнғичи бўлган, яъни актрисанинг укаси ва синглиси бор. Ситора Фармонова 13 ёшида оиласи билан Тошкент шаҳрига кўчиб ўтган. У дастлаб дизайнер бўлишни орзу қилиб, шу соҳада таҳсил олади, бироқ кейинчалик фикрини ўзгартириб, актриса бўлиш орзусида Тошкент давлат санъат ва маданият институтида таҳсил олади.
Эпизод роли билан кино оламига кириб келган
Актриса кино оламидаги фаолиятини «Аёл зоти» сериалидаги эпизод роли билан бошлаган ва 16 ёшида илк бор клипда суратга тушган. Ситора Фармонова 2004 йилда «Хавфли бурилиш» кинокартинасида рол ижро этди ва ушбу фильмдаги роли орқали томошабинларнинг қалбидан жой эгаллади. Шундан кейин актриса «Келгинди қайнона», «Учинчи тилак», Қасд», «Макрли дунё», «Қадрдонлар», «Динозавр қолдирган из» каби фильмларда суратга тушди.
Съёмкада бир ўлимдан қолган актриса
Актрисанинг роллари нафақат ўзбек режиссёрларининг, балки қозоқ ва қирғиз киноижодкорларининг ҳам эътиборига тушади. Ситора Фармонова немис режиссёри Вейит Ҳелмернинг 2011 йилда суратга олинган «Байконур» фильмида йиқилиб тушиб, оғир жароҳат олган. Бу рол сабаб актрисанинг бўйни йиртилиб, очилиб қолган. Рол унга катта муваффақият кетирган, бироқ Ситора Фармонова шу сабаб бир ўлимдан қолган. Шундан кейин актриса 2013 йил Қирғизистонда суратга олинган «Ётоқхона» сериалида ҳам рол ўйнаган. Сериал мухлислар томонидан яхши кутиб олинган ва актриса Қирғизистонда ҳам шуҳрат қозонган.
Хонандаликда ва қизиқчиликда ўзини синаб кўрган
Ситора Фармонова актрисаликдан ташқари ўзини қизиқчилик ва хонандалик йўналишида синаб кўрган. Унинг хонанда Миржалол билан бирга ижро этган «Баҳор-куз» номли таронаси мухлислар ва танқидчиларнинг эътирофига сазовор бўлган. Шундан кейин актриса «Айт», «Чаманда гул» тароналарини ижро этган. У чет эл хонандаси билан ҳам дуэт куйлаган, қирғизистонлик Мирбек Атабеков ижро этган «Икки юрак» таронаси «Ётоқхона» сериалининг саундтрекига айланган. Актриса 2015 йилдан бошлаб «Азия Микс» номли жамоа аъзоси сифатида «Қувноқлар ва зукколар» танловида иштирок этади. Жамоа турли мамлакат фуқаролари: тожикистонлик, ўзбекистонлик, қозоғистонлик ва қирғизистонлик ўйинчилардан иборат.
Танқидлар остида қолган ва санъатда қийинчиликларга дуч келган актриса
Ситора Фармонова 2016 йилда, «Қувноқлар ва зукколар» танловидан сўнг «Ўзбекнаво» томонидан бериладиган лицензиясидан маҳрум қилинган. Бунга эса актрисанинг хорижга чиқиш тартиб-қоидаларини бузгани сабаб бўлган. Бундан ташқари, актрисанинг танловда чиқиши кўплаб танқидларга учраган. Кейинчалик актриса бу ҳолатга муносабат билдириб, лицензияси олиб қўйилганини билмаганини, яна лицензия олиши ҳақида гапирган.
Ситора Фармонова қиймати 700 минг долларга тенг Голливуд кинофильмида суратга тушишни рад этган
Актриса 2008 йилда Голливуддан тушган лойиҳа таклифини рад этган. Sony Intertainment Productions томонидан суратга олинаётган сериал икки йиллик шартномани ўз ичига олган ва лойиҳа контракти 700 минг долларга тенг бўлган. У ўша пайтда 24 ёшда бўлгани, сериалнинг 50-қисмидан кейинги ножўя саҳналар учун лойиҳани рад этганини айтган. Актриса учун пул эмас, одоб-ахлоқ, ҳаё, ор-номус биринчи ўринда туришини таъкидлаган.
Шахсий ҳаёти ва оиласи ҳақидаги маълумотни сир сақловчи актриса
Ўзбек-шоу бизнесининг айрим вакиллари сингари Ситора Фармонова ҳам шахсий ҳаёти билан боғлиқ маълумотларни сир сақлашни тўғри деб билади. Актриса баъзида ижтимоий тармоқлардаги саҳифасига онаси ва укаси билан тушган суратларини жойлаб туради. Бундан ташқари, у нима сабабдан ҳалигача турмуш қурмаганининг сабабини сўраган мухлисларига бу шахсий масала эканини, умуман олганда, мухлисларидан шахсий ҳаёти билан боғлиқ маълумотларни сўрамаслигини ва бу ҳолатни тўғри тушуниш кераклигини таъкидлаган.
Ситора Фармонова нима сабабдан шу вақтга қадар турмуш қурмагани ҳақида
Актриса шу вақтга қадар нима сабабдан турмуш қурмагани ҳақидаги саволга «Ҳаётимда гўзаллигим ва ижодимни баҳоламасдан, мени тушуна оладиган, боримча қабул қила оладиган инсонни ҳали учратмаганман, балки шу сабаб бўлаётгандир», — дея жавоб берган. Бундан ташқари, у шахсий ҳаёти билан тарқалган миш-мишларга жавоб қайтармаслиги ҳақида ҳам гапирган. Актрисага ўзбек шоу-бизнесининг таниқли вакиллари турмуш қуришни таклиф қилган, бироқ Ситора Фармонова уларнинг барчасини рад этган.
Азиз Раметовнинг турмуш қуриш таклифини рад этган, бироқ ўзидан 15 ёш кичик блогер Дониёр Қаюмов билан пиар қилган
Актрисанинг онаси Замира Фармонова «Севимли» телеканалининг «Машҳурлар» лойиҳаси меҳмони бўлган ва кўрсатувда Замира Фармонова таниқли актёр Азиз Раметов қизининг қўлини сўрагани ҳақида сўзлаб берган.
«Азиз Раметов бир неча марта қизимга уйланиш нияти борлигини айтган. Онажон, хўп денг, қизингизга уйланаман, совчи юбораман, у билан неча йилдан бери бир-биримизни таниймиз, характеримизни биламиз, деган. Лекин тақдир экан. Аллоҳим буларнинг юлдузларини бир-бирига ўхшатмади. Азиз Раметов жуда яхши бола, унинг онасини танийман, жуда яхши инсон», — деган эди Замира Фармонова.
Ситора Фармонова 2020 йилда ўзидан 15 ёш кичик блогер Дониёр Қаюмов билан яқин муносабатда экани ва уларнинг турмуш қуриши ҳақида миш-мишлар тарқалди. Бунга эса Дониёр Қаюмов ва Ситора Фармонованинг биргаликда суратга тушган расмлари ва видеолари сабаб бўлган. Орадан бир ой ўтиб блогер Ситора Фармонова билан муносабатлари тугаганини, бу эса актриса гап-сўзларга ишонгани туфайли бўлганини таъкидлаган. Вақт ўтиб уларнинг иккаласи ҳам саҳифасидан бирга тушган сурат ва видеоларини ўчириб ташлаган.
Клиплардаги бир-бирини такрорламайдиган ижролар
Актриса санъат оламидаги фаолияти давомида кўплаб хонандаларнинг клипида суратга тушган. Шоҳруххоннинг «Оддий бола», «Салом севги», Муниса Ризаеванинг «Ёмғир», «Дил» ва бундан ташқари кўплаб клипларда турли хил образларни гавдалантирган.
Мавзуга доир:
- Жавоҳир Зокиров, Алишер Узоқов, Ситора Фармонова. Чет эл кинофильмларида рол ижро этган ўзбек актёрлари (видео).
- Instagram: Янги машинали бўлган Ситора Фармонова, Отабек Муталхўжаевнинг отасига қимматбаҳо совғаси, кинога қайтаётган Зарина Низомиддинова.
- Instagram: Отабек Мирзахолов янги машина харид қилди, Ситора Фармонова қандай инсонга турмушга чиқади? Нуриддин Ҳамроқулов хонадонида тўй.
- Instagram: Жаҳонгир Отажоновнинг Президент билан учрашган қиёфадоши, туғилган кунини нишонлаган Ситора Фармонова, Севинчдан ажабтовур рақс.
Изоҳ (0)