Buyuk Britaniya parlamenti saylovda ovoz berish 16 yoshdan boshlanishi borasida taklif kiritdi. Bu haqda The Guardian xabar berdi.
Mamlakat hukumatining taʼkidlashicha, 16 va 17 yoshdan saylovda ishtirok etishni boshlash “adolatliroq” bo‘ladi. Sababi bu yoshdagilarning aksariyati ish bilan taʼminlangan va harbiy xizmatni o‘tashga qodir. Bosh vazir Kir Starmer soliq to‘laydigan o‘smirlar “pulning qanday sarflanishi” haqida o‘z fikrlarini bildirishi muhimligini aytgan.
Ilgari surilayotgan taklif qabul qilinsa, butun Buyuk Britaniya bo‘ylab ovoz berish yoshi 16 etib belgilanadi. Shotlandiya va Uelsda bu qonun allaqachon amaliyotga tatbiq etilgan. So‘nggi marta ovoz berish yoshi 1969-yili 21 yoshdan 18 yoshgacha pasaytirilgandi.
Mamlakatning baʼzi leyborist deputatlari bu harakat teskari natija berishi va ko‘proq chap qanot partiyalarini qo‘llab-quvvatlashga turtki bo‘lishidan xavotirda. Ammo yangilik demokratiyani kuchaytirishni ilgari surayotgan targ‘ibotchilar tomonidan olqishlangan. Konservatorlar esa 16 va 17 yoshli bolalar qonuniy ravishda chekishi, spirtli ichimlik ichishi yoki lotereya chiptasini sotib olishi taqiqlanganini aytib, bu qaror “nojo‘ya” ekanini bildirgan.
“Meni ko‘proq noto‘g‘ri maʼlumot, soxta yangiliklar, odamlarning bugungi kundagi maʼlumotlarni qanday qabul qilishi xavotirga solmoqda. Shunday ekan, qanday qilib 16-17 yoshli bolalar saylovda qatnashishi mumkin? Bu demokratiyaga katta to‘siq bo‘ladi”, dedi deputatlardan biri.
Yevropada, xususan, Avstriya, Malta, Men va La-Mansh orollarida saylovda qatnashishga 16 yoshdan ruxsat beriladi. Braziliya, Argentina va Kuba kabi davlatlarda ham bunday qonun allaqachon amalda qo‘llanadi.
Izoh (0)