Ukrainaliklar yangi mavsumda yoshlar va sport vazirligi yo‘riqnomasi asosida, mudofaa vazirligi va politsiya bilan kelishgan holda yangi mavsum futbol musobaqalarini o‘tkazish rejasini tasdiqladi.
“O‘yinlar tomoshabinlarsiz o‘tkaziladi. Cheklangan miqdordagi akkreditatsiyadan o‘tgan shaxslar — futbolchilar, murabbiylar, hakamlar, uchrashuv rasmiylari, xodimlar, akkreditatsiyadan o‘tgan OAV, tibbiyot xodimlari, Davlat favqulodda vaziyatlar xizmati, milliy politsiya vakillarining ishtirok etishiga ruxsat beriladi.
Stadion mutasaddilari evakuatsiya rejasiga ega bo‘lishi va barcha davlat xavfsizlik qoidalariga javob beradigan, o‘yindagi ishtirokchilarni to‘liq sig‘dira oladigan boshpanalarni tayyorlab qo‘yishi talab etiladi. Boshpanalar stadionlardan 500 metrdan uzoq bo‘lmagan masofada joylashgan bo‘lishi lozim.
Havo hujumi haqida ogohlantirish paydo bo‘lgan taqdirda, stadion diktori: ‘Diqqat! Ogohlantirish! Barchadan boshpanalardan joy olishini so‘raymiz’, — deya e’lon berishi kerak. Uchrashuv hakami darhol o‘yinni to‘xtatish uchun hushtak chaladi va jamoalar bilan birgalikda boshpana tomon yo‘l oladi”, — deb yozadi ijtimoiy tarmoqlarda Ukraina yoshlar va sport vaziri Vadim Gutsayt.
Ukraina Premyer Ligasining 1-turi 23-avgust kuni start oladi. Mamlakat chempioni “Shaxtyor” Xarkovning “Metallist 1925” jamoasini qabul qilsa, vitse-chempion “Dinamo” “Ingults” bilan bahs olib boradi. “Shaxtyor” va “Dinamo”ning o‘zaro o‘yini 7-turga to‘g‘ri keladi.
Izoh (0)