Temurxo‘ja Abduxoliqov Superliga to‘purarlari ro‘yxatida yetakchiga aylandi. “Qizilqum” gol urish borasida faqat bir jamoadan ortda

Futbol bo‘yicha O‘zbekiston Superligasining 16-turi uchrashuvlari 16—18-avgust kunlari bo‘lib o‘tdi.

Ortda qolgan 16 tur yakunlari bo‘yicha “Qizilqum” hujumchisi Temurxo‘ja Abduxoliqov 10 ta gol bilan to‘purarlar ro‘yxatida yetakchilik qilmoqda. Undan keyingi o‘rinlarni “Paxtakor” vakili Dragan Cheran (9) va “So‘g‘diyona” forvardi Shohruz Norxonov (8) band etib turibdi.

“Qizilqum” joriy mavsum gol urish borasida faqat “Nasaf”dan ortda qolmoqda. Navoiyliklar hozirga qadar 26 ta to‘p kiritgan bo‘lsa, Qarshi jamoasi 27 bor raqib darvozasini ishg‘ol qilgan.

To‘purarlar ro‘yxatida borayotgan Husayn Norchayev va Oybek Bozorov “Nasaf”ning deyarli 50% goliga muallif bo‘lgan.

Qayd etish kerak, “So‘g‘diyona” OFK Kubogidagi ishtiroki sabab 16-tur doirasida “Neftchi”ga qarshi o‘yinni hali o‘tkazgani yo‘q.