Iste’molchilar huquqlarini himoya qilish agentligi tomonidan armaturaning mexanik xususiyatlari va kimyoviy tarkibi sifatini aniqlash maqsadida ekspertiza o‘tkazildi.
Agentlik matbuot xizmatining xabar berishicha, sinov uchun amalda sotuvda bo‘lgan quyidagi namunalar xarid qilindi:
- A400 klassidagi 12 mm diametrli armatura namunasi “Dimax sanoat-savdo ko‘rgazma biznes markazi” MCHJ (Toshkent shahri, Nazarbek temir bozori) savdo majmuasidan. “Akril metall prokati”ga tegishli;
- A400 klassidagi 16 mm diametrli armatura namunasi Metall Center MCHJ (Toshkent shahri, “Izza” temir bozori) savdo majmuasidan. Wang Da Group MCHJ QKga tegishli;
- A400 klassidagi 12 mm diametrli armatura namunasi, “Jo‘rabek Omad baraka” MCHJ (Toshkent shahri, Izza temir bozori) savdo majmuasidan. Wangda Metal MCHJ QKga tegishli.
- A400 klassidagi 8 mm diametrli armatura namunasi, Technobusiness Lux MCHJga qarashli savdo rastasidan (Sirdaryo viloyati). Bao Xin Metall MCHJga tegishli.
Tahlil natijalaridan armatura namunalari mexanik hamda kimyoviy xossalari belgilangan me’yorlarga javob bermasligi aniqlangan.
“Kutilgan tahlil natijalari achinarli bo‘lib, standart talablariga nomuvofiqligini ko‘rsatdi. Ya’ni Metall prokati — armatura namunalari mexanik hamda kimyoviy xossalari belgilangan me’yorlarga javob bermadi. Bunda ayniqsa, kichik korxonalar tomonidan ishlab chiqarilayotgan, qurilish maqsadlarida ishlatiladigan metall prokatida aniqlangan kamchiliklari ko‘plab qurilish sifati va xavfsizligiga katta zarar yetkazmoqda.
Zero, quruvchilar tomonidan qad rostlagan va foydalanishga topshirilgan ko‘p qavatli uy va inshootlar o‘nlab yillar davomida mustahkam hamda xavfsiz maskan bo‘lib xizmat qilishi kerak. Shuni ta’kidlash lozimki, ayrim hollarda korxonalar o‘z mahsulotlarini muvofiqlik sertifikatisiz sotayotgan holatlar ham bor”, — deya qayd etilgan xabarda.
Agentlik xavfsizlik va sifat talablariga javob bermaydigan armaturalarni sotishni taqiqlash masalasini ko‘rib chiqish uchun Qurilish vazirligiga, shuningdek vazirlik huzuridagi Qurilish sohasida nazorat inspeksiyasiga tegishli ma’lumotlarni yuborgan. Inspeksiya tomonidan yuqorida ko‘rsatilgan talablarga javob bermaydigan metall buyumlardan qurilish obyektlarida foydalanishni taqiqlash to‘g‘risida buyruq chiqarilgan.
Izoh (0)