Ўзбекистонда сотилаётган айрим арматуралар хавфсизлик ва сифат талабларига жавоб бермаслиги аниқланди

Истеъмолчилар ҳуқуқларини ҳимоя қилиш агентлиги томонидан арматуранинг механик хусусиятлари ва кимёвий таркиби сифатини аниқлаш мақсадида экспертиза ўтказилди.

Агентлик матбуот хизматининг хабар беришича, синов учун амалда сотувда бўлган қуйидаги намуналар харид қилинди:

• А400 классидаги 12 мм диаметрли арматура намунаси «Димах саноат-савдо кўргазма бизнес маркази» МЧЖ (Тошкент шаҳри, Назарбек темир бозори) савдо мажмуасидан. «Акрил металл прокати»га тегишли;
• А400 классидаги 16 мм диаметрли арматура намунаси Metall Center МЧЖ (Тошкент шаҳри, «Изза» темир бозори) савдо мажмуасидан. Wang Da Group МЧЖ ҚКга тегишли;
• А400 классидаги 12 мм диаметрли арматура намунаси, «Жўрабек Омад барака» МЧЖ (Тошкент шаҳри, Изза темир бозори) савдо мажмуасидан. Wangda Metal МЧЖ ҚКга тегишли.
• А400 классидаги 8 мм диаметрли арматура намунаси, Technobusiness Lux МЧЖга қарашли савдо растасидан (Сирдарё вилояти). Bao Xin Metall МЧЖга тегишли.

Таҳлил натижаларидан арматура намуналари механик ҳамда кимёвий хоссалари белгиланган меъёрларга жавоб бермаслиги аниқланган.

«Кутилган таҳлил натижалари ачинарли бўлиб, стандарт талабларига номувофиқлигини кўрсатди. Яъни Металл прокати — арматура намуналари механик ҳамда кимёвий хоссалари белгиланган меъёрларга жавоб бермади. Бунда айниқса, кичик корхоналар томонидан ишлаб чиқарилаётган, қурилиш мақсадларида ишлатиладиган металл прокатида аниқланган камчиликлари кўплаб қурилиш сифати ва хавфсизлигига катта зарар етказмоқда.

Зеро, қурувчилар томонидан қад ростлаган ва фойдаланишга топширилган кўп қаватли уй ва иншоотлар ўнлаб йиллар давомида мустаҳкам ҳамда хавфсиз маскан бўлиб хизмат қилиши керак. Шуни таъкидлаш лозимки, айрим ҳолларда корхоналар ўз маҳсулотларини мувофиқлик сертификатисиз сотаётган ҳолатлар ҳам бор», — дея қайд этилган хабарда.

Агентлик хавфсизлик ва сифат талабларига жавоб бермайдиган арматураларни сотишни тақиқлаш масаласини кўриб чиқиш учун Қурилиш вазирлигига, шунингдек вазирлик ҳузуридаги Қурилиш соҳасида назорат инспекциясига тегишли маълумотларни юборган. Инспекция томонидан юқорида кўрсатилган талабларга жавоб бермайдиган металл буюмлардан қурилиш объектларида фойдаланишни тақиқлаш тўғрисида буйруқ чиқарилган.