Bugun, 28-iyul kuni taniqli bastakor va sozanda Sultonali Rahmatov vafot etdi. Bu haqda marhumning oilasiga yaqin ijodkor Doniyor G‘oyipov “Daryo”ga maʼlum qildi.
O‘zbekistonda xizmat ko‘rsatgan madaniyat xodimi Sultonali Rahmatov olamdan o‘tdi. Xabar qilinishicha, marhum qandli diabet, jigar sirrozi va buyrakda suv yig‘ilishi kasalliklari bilan og‘rigan. Infarkt oqibatida vafot etgan.
“Bugun kasalxonadan oilasi bilan uchrashish uchun ruxsat berishgandi. Marhum Toshkent shahridagi Chig‘atoy qabristoniga dafn etiladi. Janoza 29-iyul kuni peshin namozidan keyin o‘qiladi”, deya maʼlum qildi manba.
Joriy yil 11-iyul kuni mashhur musiqa ustasi sog‘lig‘i yomonlashib, shifoxonaning jonlashtirish bo‘limida ekani haqida xabarlar tarqalgandi. Ijodkorning yaqinlari kasalxona xarajatlarini qoplash uchun saxovatpesha insonlardan yordam so‘ragan. Sultanali Rahmatov og‘ir yurak xurujini boshdan kechirgani, qarovsiz qolib ketgani kabi maʼlumotlar ham tasdiqlangan.
Maʼlumot uchun, sozanda 1970-yil 13-yanvarda Toshkent shahrida tug‘ilgan. 2010-yilda O‘zbekistonda xizmat ko‘rsatgan madaniyat xodimi unvonini olgan. 2006-yilda Nyu York qirollik akademiyasi kompozitori bo‘lgan. Shu bilan birga, O‘zbekiston kompozitorlari va bastakorlari uyushmasi aʼzosi, Mudofaa vazirligi qoshidagi qurolli kuchlar markaziy ashula va raqs ansambli badiiy rahbari bo‘lib ishlagan.
- “Dunyoni zabt eta olaman, bu qo‘limdan keladi”. Sultonali Rahmatov chet eldan ijodiy hamkorlar izlayotgani hamda 300 ming dollarga sotgan albomi haqida (video)
- “Unga qo‘l ko‘targanimdan afsusdaman”. Taniqli kompozitor Sultonali Rahmatov xonanda Nilufar Saidova bilan ajrashishi sababi haqida (video)
Sultonali Rahmatovning “O‘zbekiston”, “Hayot guli”, “Navro‘z”, “Vals”, “Sharq taronasi” va boshqa ko‘plab musiqalari mashhur.
Izoh (0)