Bugun, 28-iyul kuni Turkiyaning Istanbul shahridan Toshkent shahriga uchayotgan samolyotda texnik nosozlik yuzaga kelgan. Bu haqda Uzbekistan Airways xabar berdi.
Maʼlum qilinishicha, HY272 reysini bajarayotgan samolyot havoga ko‘tarilgan. Oradan 1 soat o‘tib, havo kemasining signalizatsiya tizimi ishga tushgan. Tizim salon va kabinadagi bosimning beqarorligi haqida signal bergan.
“Parvoz xavfsizligini taʼminlash maqsadida havo kemasi komandiri samolyotni jo‘nash aeroportiga qaytarish to‘g‘risida qaror qabul qildi. Mahalliy vaqt bilan 15:50 da samolyot Istanbul aeroportiga muvaffaqiyatli qo‘ndi. Aviakompaniyaning texnik xizmatlari havo kemasini Toshkentdagi bazaga qaytarish bo‘yicha zarur choralarni ko‘rmoqda. Ushbu reys yo‘lovchilari zaxira havo kemasi orqali Toshkentga yetkaziladi va kutish davrida mehmonxonaga joylashtiriladi”, deyiladi manba xabarida.
Aviakompaniya axborotiga ko‘ra, yo‘lovchilar Istanbuldan 29-iyul kuni mahalliy vaqt bilan soat 07:30 da uchib, Toshkentga soat 13:35 da yetib keladi.
Izoh (0)