Shavkat Mirziyoyev 17-avgust kunining ikkinchi yarmida Saudiya Arabistoniga davlat tashrifi doirasida Jidda shahriga keldi, deb xabar bermoqda davlat rahbari matbuot xizmati. Prezidentni Podshoh Abdulaziz nomidagi xalqaro aeroportda Makka mintaqasi rahbarlari, investitsiyalar vaziri Xolid al-Falih va boshqa rasmiy shaxslar kutib olgan.
“Qasr as-Salam” saroyida rasmiy kutib olish marosimi o‘tkazilgan. Shavkat Mirziyoyevni Saudiya Arabistonining Valiahd shahzodasi Muhammad bin Salmon Ol Saud kutib olgan. Oliy martabali mehmon sharafiga faxriy qorovul saf tortdi. Ikki davlat madhiyalari ijro etilgan.
Shundan so‘ng Shavkat Mirziyoyev va Saudiya Arabistoni Podshohligi Valiahd shahzodasi Muhammad bin Salmon Ol Saudning muzokaralari bo‘lib o‘tgan. Uchrashuv avvalida Shavkat Mirziyoyev Saudiya Arabiston Podshohi Salmon bin Abdulaziz Ol Saudga o‘zining samimiy salomi va eng ezgu tilaklarini yetkazgan.
Xabarda aytilishicha, turli darajalardagi aloqalar ancha faollashgani mamnuniyat bilan ta’kidlandi. Hukumatlararo komissiya va Ishbilarmonlar kegashining yig‘ilishlari muntazam o‘tkazilmoqda. O‘zaro tovar ayirboshlash hajmi ortmoqda, qo‘shma korxonalar tashkil etilmoqda.
Shu bilan birga, mamlakatlar munosabatlarni, eng avvalo savdo-iqtisodiy sohadagi hamkorlikni sifat jihatidan yangi darajaga ko‘tarish uchun ulkan salohiyatga ega. O‘zbekiston prezidenti Saudiya Arabistoniga ilk davlat tashrifi buning uchun keng imkoniyatlar ochishiga ishonch bildirdi.
Tomonlar ikki mamlakat o‘rtasidagi siyosiy, savdo-iqtisodiy, investitsiyaviy, madaniy-gumanitar sohalardagi o‘zaro manfaatli aloqalarni yanada kengaytirish masalalarini ham muhokama qilgan.
Ishbilarmonlarning aloqalari uchun yanada qulay sharoitlar yaratish, o‘zaro savdo hajmini oshirish, tarkibini diversifikatsiya qilish zarurligi qayd etilgan. Ta‘kidlanishicha, O‘zbekistonda Saudiya Arabistoni fuqarolari uchun vizasiz tartib joriy etilishi bu borada muhim qadamlardan biri bo‘ladi.
“Bugungi tarixiy uchrashuvimiz hamkorligimizni amaliy natijalar bilan boyitish, biznes aloqalari uchun “kuchli signal” bo‘lishiga aminman. Davlatlarimiz tadbirkorlari muloqotimiz natijalarini intiqlik va katta qiziqish bilan kutayapti”, — degan Shavkat Mirziyoyev va Saudiyaning yetakchi kompaniyalarini O‘zbekistondagi tijorat banklari, yirik sanoat va infratuzilma obyektlarini xususiylashtirish jarayonida faol ishtirok etishga chaqirgan.
Bundan tashqari, energetika va neft-kimyo sohalaridagi sheriklikni kengaytirishdan ikki tomon ham manfaatdor ekani ta’kidlangan. Bugungi kunda kunda ACWA Power kompaniyasi bilan jami 2 milliard 600 million dollarlik yirik energetika loyihalari boshlangan. Kimyo tarmog‘ida SABIC kompaniyasi bilan sheriklik istiqbollidir.
Saudiya taraqqiyot jamg‘armasi ishtirokida O‘zbekiston hududlarida transport, suv ta’minoti, elektr tarmoqlarini rivojlantirish bo‘yicha infratuzilma loyihalarini amalga oshirish masalalari ko‘rib chiqilgan.
O‘zbekiston-Saudiya Ishbilarmonlar kengashining navbatdagi yig‘ilishi muvaffaqiyatli o‘tkazilgani mamnuniyat bilan qayd etilgan. Uning yakunida energetika, kimyo, elektrotexnika, infratuzilmani rivojlantirish, sog‘liqni saqlash, qishloq xo‘jaligi, farmatsevtika, axborot texnologiyalari va transport sohalarida umumiy qiymati 14 milliard dollardan ortiq bo‘lgan kelishuv va shartnomalar imzolangan.
Uchrashuvda madaniy-gumanitar aloqalarni mustahkamlashga ham alohida e’tibor qaratilgan, xalqaro va mintaqaviy masalalar yuzasidan ham fikr almashilgan. Xavfsizlik sohasida muloqotni yo‘lga qo‘yish, Afg‘onistonda tinchlikni mustahkamlash va iqtisodiyotni tiklashga ko‘maklashish bo‘yicha sa’y-harakatlarni birlashtirish yuzasidan yakdil fikr bildirilgan.
O‘zbekiston prezidenti Saudiya Arabistonining Shanxay hamkorlik tashkilotida Muloqot bo‘yicha sherik maqomini olayotganini olqishlagan.
Muzokaralar natijalari bo‘yicha imzolangan hujjatlar almashilgan. O‘zbekiston Respublikasi bilan Saudiya Arabistoni Podshohligi o‘rtasida keng qamrovli sheriklik munosabatlarini yanada kengaytirish to‘g‘risida Qo‘shma bayonot qabul qilingan. Ikki mamlakat hukumatlari va vazirliklari o‘rtasida energetika, bojxona, fuqaro aviatsiyasi, turizm, qishloq xo‘jaligi, sog‘liqni saqlash, mehnat munosabatlari kabi sohalarda hamkorlikka doir 15 ta hujjat qabul qilingan.
Shavkat Mirziyoyev tashrifi sharafiga Podshoh Salmon bin Abdulaziz Ol Saud nomidan qabul marosimi o‘tkazilgan.
Mavzuga doir:
Izoh (0)