Samarqand viloyatining Samarqand va Xorazm viloyatining Qo‘shko‘pir tumanlarida subsidiya mablag‘larini talon-toroj qilgan shaxslar aniqlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Samarqand tuman bo‘limi tomonidan tergovga qadar tekshiruv o‘tkazilgan. Unda “E.t.” MCHJ rahbari F.N. va boshqalar “Yangijoy” MFY hududida oldindan mavjud bo‘lgan suv qudug‘ini yangidan qurgani, 30 ta xonadonning tomorqalarini suv bilan ta’minlab jami 177,1 million so‘mlik qurilish ishlarini amalga oshirilgani to‘g‘risida soxta dalolatnoma tuzgani aniqlangan. Ular budjetdan ajratilgan 118,8 million so‘m subsidiya mablag‘ini o‘zining plastik kartasiga o‘tkazib olib, talon-toroj qilgan.
Shuningdek, Qo‘shko‘pir tuman bo‘limi tomonidan tergovga qadar tekshiruv o‘tkazilgan. Unda “X.Yo.” va “G‘.Yo.” ishlab chiqarish kooperativi rahbarlari tuman Aholi bandligiga ko‘maklashish markazi mas’ul shaxslari bilan til biriktirib, 21 nafar fuqaroni ish bilan ta’minlash uchun ajratilgan 105,1 million so‘m subsidiya mablag‘ini o‘zlashtirish yo‘li bilan talon-toroj qilgani aniqlangan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)