Самарқанд вилоятининг Самарқанд ва Хоразм вилоятининг Қўшкўпир туманларида субсидия маблағларини талон-торож қилган шахслар аниқланди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Самарқанд туман бўлими томонидан терговга қадар текширув ўтказилган. Унда «Э.т.» МЧЖ раҳбари Ф.Н. ва бошқалар «Янгижой» МФЙ ҳудудида олдиндан мавжуд бўлган сув қудуғини янгидан қургани, 30 та хонадоннинг томорқаларини сув билан таъминлаб жами 177,1 миллион сўмлик қурилиш ишларини амалга оширилгани тўғрисида сохта далолатнома тузгани аниқланган. Улар бюджетдан ажратилган 118,8 миллион сўм субсидия маблағини ўзининг пластик картасига ўтказиб олиб, талон-торож қилган.
Шунингдек, Қўшкўпир туман бўлими томонидан терговга қадар текширув ўтказилган. Унда «Х.Ё.» ва «Ғ.Ё.» ишлаб чиқариш кооперативи раҳбарлари туман Аҳоли бандлигига кўмаклашиш маркази масъул шахслари билан тил бириктириб, 21 нафар фуқарони иш билан таъминлаш учун ажратилган 105,1 миллион сўм субсидия маблағини ўзлаштириш йўли билан талон-торож қилгани аниқланган.
Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)