Ўзбекистонда ногиронлик пенсиясини олувчи ишлаётган фуқароларга бир қатор имтиёзлар берилиши мумкин

Олий Мажлис Қонунчилик палатасининг Меҳнат ва ижтимоий масалалар қўмитаси томонидан кенгайтирилган йиғилиш ўтказилди. Унда қуйи палата депутатлари, тегишли вазирлик ва идоралар вакиллари, ишчи гуруҳ аъзолари, олимлар, экспертлар иштирок этди, деб хабар бермоқда қуйи палата ахборот хизмати.

Қайд этилишича, йиғилишда депутатлар томонидан «Фуқароларнинг давлат пенсия таъминоти тўғрисида»ги қонунга пенсия тайинлаш тартибини такомиллаштиришга қаратилган ўзгартиш ва қўшимчалар киритиш ҳақида»ги қонун лойиҳаси дастлабки тарзда кўриб чиқилган.

Мазкур қонун лойиҳаси президентнинг 2022 йил 29 апрелдаги «Ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги қарорининг 6-банди ижросини таъминлаш мақсадида ишлаб чиқилган.

Ҳужжатда «Фуқароларнинг давлат пенсия таъминоти тўғрисида»ги қонунига тегишли ўзгартиш ва қўшимчалар киритиш йўли билан 2023 йил 10январдан бошлаб I ва II гуруҳ ногиронлиги бўлган шахсларнинг пенсия тайинлангандан кейинги камида 1 йиллик меҳнат даври уларнинг ойлик даромадидан келиб чиқиб ҳар 2 йилда қайта ҳисобланиши ва пенсия миқдорига қўшиб борилиши назарда тутилмоқда.

Йиғилишда қонун лойиҳасига киритилаётган ўзгартиш ва қўшимчалар имконияти чекланган минглаб фуқароларнинг ижтимоий ҳимоясини кучайтириш, оғирини енгил қилиш, оилалар фаровонлигини оширишга хизмат қилиши таъкидланган.

Муҳокамалар давомида қонун лойиҳасидаги айрим нормалар юзасидан асосли таклифлар, фикр-мулоҳазалар билдирилган. Депутатлар ишчи гуруҳ аъзоларига бир қатор саволлар билан юзланган ва уларга батафсил жавоблар олган.

Якунда қўмита аъзолари қонун лойиҳасини Қонунчилик палатасининг навбатдаги кенгаш йиғилиши ва ялпи мажлисига биринчи ўқишда кўриб чиқиш мумкинлиги тўғрисидаги қарорни қабул қилган.