Facebook'dagi "Potrebitel" guruhida foydalanuvchi tomonidan Click to‘lov tizimida ochilgan akkauntni qaytib hech qachon o‘chirib bo‘lmasligi haqidagi ma'lumot qizg‘in munozaralarga sabab bo‘ldi.
Ma’lum qilishicha, agar siz mazkur to‘lov tizimi xizmatlaridan foydalanishni to‘xtatib, telefoningizdan mobil dasturni o‘chirib yuborsangiz ham, telefon raqamingizga ochilgan akkaunt o‘chmas ekan.
"Daryo" vaziyatga aniqlik kiritish uchun Click to‘lov tizimi marketing bo‘limi boshlig‘i Bobir Nazarzoda bilan bog‘landi.
“Bir narsani tushunish kerak. Akkauntni o‘chirgan bilan foydalanuvchining to‘lov ma’lumotlari kompaniyada, bankda baribir qoladi. Shaxsiy ma’lumotlarni saqlash to‘g‘risidagi qonunga ko‘ra, bu ma’lumotlar ma’lum vaqt saqlanishi kerak.
Agar foydalanuvchi o‘z telefon raqamidan foydalanish imkoniyatini yo‘qotgan bo‘lsa, u kompaniyamizga darhol murojaat qilishi lozim. Kontakt-Markazimizga tushgan bunday murojaatlar darhol ishlanib, oldingi telefon raqamdan ma’lumotarni ko‘rish imkoni yopiladi.
Yaqinda chiqadigan yangi mobil ilovada ushbu imkoniyatni avtomatlashtirib, foydalanuvchilarga yengillik yaratmoqchimiz. Unda ular o‘zlari tugmani bosgan holda, o‘z ma’lumotlarini o‘chirish imkoniga ega bo‘lishadi”, - dedi Bobir Nazarzoda.
Izoh (0)