Investitsiyalar va tashqi savdo vazirligi tomonidan tashkil etilgan Call-markazga tadbirkorlardan 10 mingdan ortiq murojaat kelib tushdi. Bu haqda bugun, 17-avgust kuni o‘tkazilgan “Tadbirkorlar bilan muloqot haftaligi” tadbirida vazir o‘rinbosari Aziz Voitov ma’lum qildi, deya xabar bermoqda “Daryo” muxbiri.
Aziz Voitov o‘z nutqida tadbirkorlardan eng ko‘p murojaat qilinayotgan masalalarga to‘xtaldi.
“O‘zbekiston prezidentining tadbirkorlar bilan o‘tkazadigan navbatdagi muloqotini tizimli o‘tkazish maqsadida Call-markaz va doimiy shtab tashkil etildi. Ayni paytgacha call-markazga tadbirkorlik subyektlaridan 10 mingtadan ortiq murojaatlar kelib tushdi. Eng ko‘p murojaatlar biznesni moliyalashtirish, kreditlash va subsidiyalar, soliq tizimi, xususiylashtirish masalalarida bo‘lmoqda. Shuni aytish kerakki, ularning 73 foizidan ortig‘i ijobiy hal qilinishiga erishildi”, – dedi vazir o‘rinbosari.
Ma’lum qilinishicha, joriy yilning o‘tgan 7 oyi davomida 5 milliard 600 million dollarlik xorijiy investitsiyalar o‘zlashtirildi. Qiymati 2 milliard 200 million dollarlik 40 ta yirik va ahamiyatli loyihalarning ishga tushirilishi hisobiga 6 mingtaga yaqin yangi ish o‘rinlari yaratildi.
“Eng muhimi, dunyodagi geosiyosiy vaziyatga qaramay eksport ko‘rsatkichlari ushbu davr mobaynida 8,2 milliard dollardan oshdi”, – deya qo‘shimcha qildi Aziz Voitov.
Izoh (0)