Investициялар ва ташқи савдо вазирлиги томонидан ташкил этилган Call-марказга тадбиркорлардан 10 мингдан ортиқ мурожаат келиб тушди. Бу ҳақда бугун, 17 август куни ўтказилган «Тадбиркорлар билан мулоқот ҳафталиги» тадбирида вазир ўринбосари Азиз Воитов маълум қилди, дея хабар бермоқда «Дарё» мухбири.
Азиз Воитов ўз нутқида тадбиркорлардан энг кўп мурожаат қилинаётган масалаларга тўхталди.
«Ўзбекистон президентининг тадбиркорлар билан ўтказадиган навбатдаги мулоқотини тизимли ўтказиш мақсадида Call-марказ ва доимий штаб ташкил этилди. Айни пайтгача cалл-марказга тадбиркорлик субъектларидан 10 мингтадан ортиқ мурожаатлар келиб тушди. Энг кўп мурожаатлар бизнесни молиялаштириш, кредитлаш ва субсидиялар, солиқ тизими, хусусийлаштириш масалаларида бўлмоқда. Шуни айтиш керакки, уларнинг 73 фоизидан ортиғи ижобий ҳал қилинишига эришилди», – деди вазир ўринбосари.
Маълум қилинишича, жорий йилнинг ўтган 7 ойи давомида 5 миллиард 600 миллион долларлик хорижий инвестициялар ўзлаштирилди. Қиймати 2 миллиард 200 миллион долларлик 40 та йирик ва аҳамиятли лойиҳаларнинг ишга туширилиши ҳисобига 6 мингтага яқин янги иш ўринлари яратилди.
«Энг муҳими, дунёдаги геосиёсий вазиятга қарамай экспорт кўрсаткичлари ушбу давр мобайнида 8,2 миллиард доллардан ошди», – дея қўшимча қилди Азиз Воитов.
Изоҳ (0)