O‘zbekistonga kelgusi 5 yilda 120 mlrd dollarlik investitsiya jalb qilish rejalashtirilgan. Bu haqda “Tadbirkorlar bilan muloqot haftaligi” tadbirida Investitsiyalar va tashqi savdo vaziri o‘rinbosari Aziz Voitov ma’lum qildi, deya xabar bermoqda “Daryo” muxbiri.
Aziz Voitovning ta’kidlashicha, Taraqqiyot strategiyasida belgilangan ustivor vazifalardan biri mamlakat investitsiyaviy jozibadorligini oshirishdir.
“Strategiyada kelgusi besh yil ichida mamlakatimiz iqtisodiyotiga jami 120 milliard dollarlik, jumladan, 70 milliard dollarlik xorijiy investitsiyalarni jalb etishga erishish belgilangan”, – dedi vazirlik rasmiysi.
Ma’lum qilinishicha, O‘zbekistonda 2022-yilda 11,7 milliard dollarlik xorijiy investitsiyalar o‘zlashtiriladi.
“Shundan 9,5 milliard dollari to‘g‘ridan-to‘g‘ri xorijiy investitsiyalarni tashkil etadi. 2,2 milliard dollari xalqaro moliya institutlari va xorijiy hukumat moliya tashkilotlari mablag‘lari hisobiga to‘g‘ri keladi. Davlat-xususiy sheriklik asosida energetika, transport, sog‘liqni saqlash, ta’lim, ekologiya, kommunal xizmatlar, suv xo‘jaligi va boshqa sohalarga 14 milliard dollar investitsiya jalb etiladi”, – dedi Aziz Voitov.
Vazirlik ma’lumotlariga ko‘ra, 2026-yilga borib, respublikada eksport hajmini 30 milliard dollarga yetkazish rejalashtirilgan. Joriy yil uchun tasdiqlangan eksport ko‘rsatkichlarida esa O‘zbekistonning jami eksport hajmi 14,1 milliard dollarga yetkazilishi belgilangan. Shundan 7,4 milliard dollari tayyor va yarim tayyor mahsulotlar eksporti, 3,4 milliard dollari xom-ashyolar eksporti va 3,3 milliard dollari xizmatlar eksportiga to‘g‘ri keladi.
Izoh (0)