Qariyb ikki oydirki, dunyoda koronavirus pandemiyasining yangi to‘lqini avjida. Mutaxassislar buni COVID-19 ning yangi mutatsiyalari keng tarqalishi bilan izohlayapti.
Xususan, omikronning qator subvariantlari, ayniqsa, kentavr nomli o‘ta yuqumli kichik shtammi, shu bilan birga, deltakron deb atalgan gibrid mutatsiyasi odamlarda jiddiy xavotirlarni uyg‘otayotgan edi.
Rossiyalik shifokorlar koronavirusning ushbu turiga chalingan bemorlarda kasallik qanday kechayotgani bilan bog‘liq tahlillarini e’lon qildi.
Unda aytilishicha, keyingi paytlarda mamlakatda kentavrni yuqtirgan bemorlar soni ko‘payishi qayd etilgan. Biroq bu subvariant delta shtammi singari barchaga birdek xavf solayotgani yo‘q.
Undan keksalar va surunkali kasalliklarga chalinganlar ko‘proq aziyat chekmoqda. Qolaversa, kentavr oqibatida o‘pkaning zararlashi kuzatilayotgani yo‘q.
Mazkur mutatsiya asosan rotavirusga xos alomatlar bilan namoyon bo‘lmoqda. Bemorlarning 50 foizida esa diareya va qusish holatlari qayd etilyapti. Bundan tashqari, bosh og‘rig‘i va ba’zida bezovtalikdan shikoyat qiluvchilar ham bor.
“Kasallik 5–7 kun davom etyapti, — deydi rus shifokorlari. — Beshinchi kunga borib PZR testi manfiy natijani ko‘rsatmoqda. Trombofiliya, yurak-qon tomir xastaliklariga chalingan, intoksikatsiya va yuqori tana haroratiga ta’sirchan bemorlarda xastalik birmuncha og‘ir o‘tmoqda”.
Shuningdek, mutaxassislar deltakronga xos asosiy belgilar haqida ham ma’lumot berdi.
Qayd etilishicha, bu shtamm koronavirusning avvalgi mutatsiyalariga nisbatan yuqumli. Shu bilan birga, omikronga taqqoslaganda, statsionar davolanishni ko‘proq talab etadi. Ya’ni kasallik biroz qiyin o‘tadi.
Delta shtammida tana haroratining ko‘tarilishi uzoq vaqt kuzatilgan bo‘lsa, “omikron”da bu holat 1-3 kun davom etadi. Isitmaning yuqori ko‘rsatkichi ham faqat bir kun qayd etiladi.
Shu bilan birga, omikronga chalinganda o‘pkaning zararlanishi xavfi minimal darajada. Tomoq og‘rig‘i va quruq yo‘tal unga xos belgilar sirasidan.
Delta ta’m va hid bilish qobiliyati yo‘qolishi, oshqozon-ichak traktidagi buzilishlar bilan namoyon bo‘ladi. Omikronga chalinganlar esa ko‘proq holsizlik va bosh og‘rig‘idan shikoyat qilishadi.
Deltakron ana shu har ikki shtammga xos alomatlarni o‘zida qisman mujassam etgan. Ya’ni u qisqa muddatli yuqori tana harorati, hid bilish qobiliyatining yo‘qolishi, o‘pkaning zararlanishi bu gibrid variantga tegishlidir.
Izoh (0)