Fransiya prezidenti ma’muriyati “Barxan” operatsiyasida ishtirok etgan harbiylar Malidan olib chiqib ketilganini e’lon qildi. Shu bilan birga, Yelisey saroyi Fransiya Malidagi terrorizmga qarshi kurashni to‘xtatmoqchi emasligini ta’kidlagan. Bu haqda “Kommersant” xabar bermoqda.
Bugun, 2022-yil 15-avgust kuni ertalab, “Barxan” operatsiyasida qatnashgan so‘nggi fransuz askari Malini tark etgandan so‘ng, qayta joylashtirish jarayoni yakuniy bosqichga kirdi.Biroq prezident ma’muriyatining fikricha, bu Malida terrorizmga qarshi kurash yakunlanganini anglatmaydi. Fransiya G‘arbiy Afrika davlatlari iqtisodiy hamjamiyatining (ECOWAS) va mintaqa davlatlarining siyosiy, fuqarolik va harbiy sa’y-harakatlarini qo‘llab-quvvatlaydi.Fransiya Saxel, Gvineya ko‘rfazi va Chad ko‘li mintaqasida barqarorlik va terrorizmga qarshi kurash tarafdori bo‘lgan barcha hamkorlari bilan sodiq qoladi.
10-avgust kuni Rossiya prezidenti Malining o‘tish davri prezidenti Assimi Goita bilan mamlakatlar o‘rtasidagi hamkorlik masalalarini muhokama qildi.
Mali rahbari hamkasbiga respublikada terrorizmga qarshi kurashni kuchaytirish haqida ham gapirib berdi. Yanvar oyida Rossiya bu masalada Maliga yordam berishga tayyorligini ma’lum qilgan edi.
Ma’lumot uchun, 2014-yilda Fransiya terroristik guruhlarga qarshi kurash uchun Mali, Burkina-Faso, Mavritaniya, Niger va Chadga qo‘shin yuborgan. Operatsiya “Barxan” deb nomlandi. Unda 5 mingdan ortiq kishi ishtirok etdi. 2021-yilda Malida davlat to‘ntarishi sodir bo‘ldi. Hokimiyatga kelgan harbiylar Fransiya bilan munosabatlarni rivojlantirmay, Fransiya elchisini chiqarib yuborgan.
Izoh (0)