Angliya chempionatining 2-tur o‘yinlari o‘z nihoyasiga yetdi.
Tur yakunlariga ko‘ra, “Manchester Yunayted” turnir jadvalida 20-o‘rinni egallab turibdi.
Erik ten Hag shogirdlari dastlabki 2 turda birorta ochko jamg‘ara olmadi. “Qizil iblislar” APLning 1-turida “Brayton”ga 1:2 hisobida mag‘lub bo‘ldi, 2-turda “Brentford” de Xea darvozasiga javobsiz 4 ta gol urdi. To‘plar nisbati — 1:6.
Shuningdek, “Everton” va “Vest Hem” so‘nggi o‘rinlardan joy olgan. Ikkala jamoa ham hali ochko qo‘lga kiritmadi. Biroq ulardagi to‘plar nisbati mankunianliklardan farq qiladi. 18-o‘rinda borayotgan mersisaydliklarda to‘plar nisbati 1:3 bo‘lsa, 19-o‘rindagi “Vest Hem” birorta gol urmasdan 3 ta to‘pni o‘z darvozasidan olib chiqqan.
“Liverpul” esa Angliya chempionatining startida 2 ta durang natija qayd etdi.
Yurgen Klopp shogirdlari 1-turda “Fulhem” bilan 2:2 hisobida durang o‘ynagan bo‘lsa, Darvin Nunyes qizil kartochka olgan 2-turda “Kristal Pelas”ni yenga olmadi. Mersisaydliklar musobaqa jadvalida 12-o‘rinni band etib turibdi.
22-avgust kuni APLning 3-turi doirasida “Manchester Yunayted” va “Liverpul” o‘zaro to‘qnash keladi. Jamoalar o‘rtasidagi bahs “Old Trafford” stadionida bo‘lib o‘tadi.
Izoh (0)