«Манчестер Юнайтед» АПЛ 2-туридан кейин сўнгги ўринда боряпти, кейинги ўйин 12-поғонадаги «Ливерпуль»га қарши бўлади

Англия чемпионатининг 2-тур ўйинлари ўз ниҳоясига етди.

Тур якунларига кўра, «Манчестер Юнайтед» турнир жадвалида 20-ўринни эгаллаб турибди.

Эрик тен Ҳаг шогирдлари дастлабки 2 турда бирорта очко жамғара олмади. «Қизил иблислар» АПЛнинг 1-турида «Брайтон»га 1:2 ҳисобида мағлуб бўлди, 2-турда «Брентфорд» де Хеа дарвозасига жавобсиз 4 та гол урди. Тўплар нисбати — 1:6.

Шунингдек, «Эвертон» ва «Вест Ҳэм» сўнгги ўринлардан жой олган. Иккала жамоа ҳам ҳали очко қўлга киритмади. Бироқ улардаги тўплар нисбати манкунианликлардан фарқ қилади. 18-ўринда бораётган мерсисайдликларда тўплар нисбати 1:3 бўлса, 19-ўриндаги «Вест Ҳэм» бирорта гол урмасдан 3 та тўпни ўз дарвозасидан олиб чиққан.

«Ливерпуль» эса Англия чемпионатининг стартида 2 та дуранг натижа қайд этди.

Юрген Клопп шогирдлари 1-турда «Фулҳэм» билан 2:2 ҳисобида дуранг ўйнаган бўлса, Дарвин Нуньес қизил карточка олган 2-турда «Кристал Пэлас»ни енга олмади. Мерсисайдликлар мусобақа жадвалида 12-ўринни банд этиб турибди.

22 август куни АПЛнинг 3-тури доирасида «Манчестер Юнайтед» ва «Ливерпуль» ўзаро тўқнаш келади. Жамоалар ўртасидаги баҳс «Олд Траффорд» стадионида бўлиб ўтади.